Parabéns, timoroan 18 Hakotu Estudu iha Brasil

0
666

DILI (TATOLI)-Bolseiru timoroan sira ne’ebé estuda iha UNILAB (Universidade da Integração Internacional da Lusofonia Afro-Brasileira), Brasil, na’in 18 termina tan estudu iha universidade ne’e.

Graduadu na’in sia lisensiadu iha kursu Siénsia Natureza no Matemátika no na’in sia basarladu iha kursu Administrasaun Públika.

Bolseiru graduadu sira, liuhusi komunikadu diriji mai redasaun Ajénsia Tatoli, ohin, informa katak seremónia kolokasaun grau ne’ebé hala’o iha Campus das Auroras, Munisípiu Redenção, Estadu Ceara, Brasil marka ho emosaun no hanoin ba kareira professional hodi kontribui ba dezenvolvimentu lokál no rejionál, rejiaun nomós nasaun sira ne’ebé mak formandu sira hela ba.

“Ba estudante internasionál sira hanesan alunu timoroan sira iha kursu Administrasaun Públika no Siénsia Natureza no Matemátika nu’udar momentu úniku, ksolok no hanoin dalan posibel hodi tulun dezenvolvimenu Timor-Leste,” bolseiru graduadu sira relata.

Estudante formadu sira bele uza formasaun akadémika ho profesionalizasaun administrasaun públika iha instituisaun públika hodi hadi’a jestaun públika timoroan sira nian.

“Dialogu ho sosiedade, entidade públika sosiedade sívil ho maneira partisipativa hodi elabora polítika públika ekilibrada ida ne’ebé justa hodi nune’e ema hotu iha oportunidade hanesan polítika públika estadu nian,” graduadu sira husi kursu Administrasaun Públika esplika.

Enkuantu ba bolseiru graduadu iha Siénsia Natureza ho Matemátika kolokasaun grau nu’udar meta ida ne’ebé alkansada maibé sei iha misaun ida tan hodi hakat liu. Misaun ida ne’e mak kria polítika pedagójika ida hodi lori alunu sira tama iha prosesu ensinu Timor-Leste nian.

“Misaun ne’ebé estadu timorense fó hodi estuda iha Brasil liliu iha UNILAB ne’e hodi buka koñesimentu atuál sora no bainhira termina kursu bele fila hikas ba Timor-Leste hodi kontribui ba polítika edukasionál timoroan nian,” informa graduadu kursu Siénsia Naturál no Matemátika.

Tuir polítika edukasionál Ministériu Edukasaun Timor-Leste estudante bolseiru sira ne’ebé mak termina sira-nia kursu iha instituisaun superior iha nasaun estranjeiru sira tenke fila hikas hodi kontribui ba nasaun iha dezenvolvimentu no progresu nasaun nian.

Nune’e mós polítika pedagójika UNILAB nian mak koopera, integra, troka esperiénsia liuhusi siénsia, teknolojia no kultura entre nasaun ho lian portugés sira hodi estudante nomós peskizadór sir abele kontribui ba dezenvolvimentu lokál no rejionál sira ne’ebé mak estudante sira sei atua ba.

Entretantu, kolokasaun grau akadémiku ba graduadu no baxarladu na’in 200 inklui bolseiru timoroan na’in 18 ne’ebé hala’o iha 25 agostu ne’e asiste direta husi embaixadór Timor-Leste iha Brasil Gregório de Sousa, adidu Ministériu Edukasaun iha Brasil Abrão dos Santos do asistente adidu Cesaltino Ximenes.

Iha 27 agostu, graduadu bolseiru timoroan sira selebra misa dirije husi Padre Parókia Imaculada da Conceição, Redenção, Cé, Padre Francisco das Chegas Rodriguês hamutuk ho komunidade Munisípiu Redenção no Asosiasaun Estudante Timoroan iha UNILAB.

Estudante timoroan sira agradese ba laran luak hahú sira-nia to’o iha Brasil husi Padre Raimundo Nonato, Padre Francisco das Chegas nomós komunidade tomak iha Redenção.

Iha tempu hanesan, komunidade parokiál fó parabéns ba estudante timoroan formadu sira, gratidaun ba tempu hodi moris iha komunidade, partisipa iha grupu pastorál sira hodi hein katak bele susesu bainhira fila hikas mai Timor-Leste.

“Selebrasaun santa misa, nu’udar gratidaun ba alunu sira, agradesimentu ba moris, saúde no apoiu parokiál tomak ba estudante timoroan sira,” graduadu sira informa.

Graduadu husi kursu Administrasaun Públika mak António Gomes, Eva Filomena de Fátima Freitas, Filipa da Costa Pinto, Isaac da Conceição Martins, Jucelina Maria da Cruz, Maria Engracia Rodriguês Pereira Rebelo, Maria Cardoso Moniz, Mario da Costa Marçal no Saturnino Goudinho Oscar Pires.

Graduadu Siénsia Natureza no Matemátika mak Abrão Beneditus José Irénia Marques, Domingos dos Santos, Eva Yunus Ornai, Marcos da Cruz, Maria Evangelina dos Santos, Moises Bernardo Salsinha, Nércia Guterres Gusmão, Octavio Lisboa Guterres Fernandes no Rafael de Jesus da Costa.

(Jornalista: Rafy Belo)

(Editór : Manuel Pinto)

 

HUSIK IDA HATÁN