Outspan Agro Timor no Nova Casa Fresca Sai Vensedór ba “Prémiu Esportasaun 2017”

0
121
Nova Casa Fresca sai manán na’in ba esportadór potensiál. Foto/TradeInvest.

DILI, (TATOLI) – Outspan Agro Timor sai vensedór ba kategoria esportadór esepsionál no Nova Casa Fresca sai manán na’in ba esportadór potensiál iha eventu “Prémiu Esportasaun 2017” ne’ebé organiza husi Ajénsia Governu ba Promosaun Investimentu no Esportasaun, TradeInvest Timor-Leste (TITL).

Kompañia rua ne’e hetan insentivu ho montante U$500 ne’ebé hetan patrosina/sponsor husi kompañia TELEMOR. Outspan Agro Timor no  Nova Casa Fresca  hanesan empreza ida neebé hala’o investimentu iha setór agrikultura ne’ebe iha orientasaun ba esportasaun.

Ministru Estadu no Ministru Agrikultura no Peska, Estanislau Aleixo da Silva hatete eventu ida ne’e importante tebes ba Governu hodi fó onra no enkoraja setór privadu sira hodi investe no esporta produtu Timór nian bá merkadu internasionál, nune’e bele kontribui ba dezenvolvimentu sosiál no ekonomia Timor-Leste nian.

Avaliasaun ba aplikasaun prémiu esportasaun ne’e rigór tebes ne’ebe hala’o hosi panelista independente hosi Câmara Comércio e Indústria Timor-Leste (CCI-TL), Institutu Apoiu Dezenvolvimentu Emprezariál (IADE) no Market Development Facility (MDF).

“Durante prosesu aplikasaun, komisaun organizadora distribui aplikasaun 33 ba setór privadu sira no aplikasaun 13 maka simu (aplikasaun 9 ba kategoria 1 – esportadór esepsionál, no aplikasaun 4 ba kategoria 2 – esportadór potensiál)”, relata husi Nuno Trindade, Prezidente Juri ba Prémiu Esportasaun tinan 2017 iha sala resepsaun Suai Timor-Plaza, 28 Setembru, ho tema ba eventu ne’e “Prémiu Esportasaun-oportunidade di’ak hodi habelar ita-boot sira-ninian negósiu.

Iha okaziaun ne’e mós, Diretur Ezekutivu TITL, Arcanjo da Silva  agredese ba partisipasaun konvidadu sira hotu no rekoñse kolaborasaun no kontribusaun husi sponsor sira hotu Telemor, Timor-Plaza Hotel & Aparments, CCI-TL, IADE, MDF no Chambers of Commerce of Northern Territory ne’ebé halo eventu ne’e susesu tebes.

“Eventu “Prémiu Exsportasaun” ne’e organiza hosi Diresaun Promosaun Esportasaun TITL no sei sai hanesan eventu anuál ida hanesan mekanizmu estratéjia hodi promove investimentu no esportasaun iha Timor-Leste. Susesu hosi eventu ne’e maka susesu ita-nian hotu atu nune’e bele kontribui ba dezenvolvimentu ekonomia Timor-Leste nian”.

Partisipante ba “Premiu Esportasaun 2017”  ne’e ema hamutuk 90 ne’ebé  mai husi setór privadu (nasionál no internasionál), instituisaun Governu relevante, reprezentante hosi komunidade emprezariál no reprezentante hosi parseiru dezenvolvimentu sira. (ki)

HUSIK IDA HATÁN