Ohin, Deputadu IV Lejizlatura Plenária Dahuluk

0
656

DILI (TATOLI)-Deputadu IV lejizlatura  na’in 65, ohin, Tersa (05/09) sei halo reuniaun plenária dahuluk iha tuku 10h00 dadeer  no juramentu, iha uma Fukun Parlamentu Nasionál (PN).

Membru Parlamentu hirak ne’e reprezenta husi partidu “mais votado” FRETILIN (Frente Revolucionário Timor-Leste Independente), CNRT (Concelho Nacional da Resistência Timor-Leste), PD (Partido Democrático), PLP (Partido Libertação Popular) no KHUNTO (Kmanek Oan Haburas Timor) ne’ebé hakat liu bareira eleitorál 4% iha eleisaun lejizlativa  2017-2022 hodi reprezenta povu durante mandatu tinan lima.

 Deputadu husi FRETILIN ne’ebé lidera husi Mari Alkatiri na’in 23, deputadu CNRT ne’ebé lidera husi Eis-lider rezisténsia Kay Rala Xanana Gusmão, na’in 22 , PD nu’udar terseiru forsa polítika deputadu na’in walu no PLP ne’ebé lidera husi eis-prezidente Repúblika Taur Matan Ruak deputadu na’in hitu inklui KHUNTO partidu vensedór da-lima deputadu na’in lima.

Hafoin Sertifikasaun rezultadu eleisaun lejizlativa  husi Tribunál Rekursu notifika katak la iha partidu ida mak hetan maioria absoluta tanba ne’e FRETILIN nu’udar partidu “mais votado” lidera husi Mari Alkatiri halo negosiasaun ho partidu lima seluk hodi forma sestu governu konstitusionál no PN tuir orden konstitusionál liuhusi prosesu naruk. Ikus mai hetan konkluzaun ida hodi define, tersa, (5/09) nu’udar loron pose ba deputadu foun sira.

Ajenda no. 1/IV reuniaun plenária IV lejizlatura  iha parte rua, hahú tuku 10h00 dadeer  mak hanesan abertura reuniaun plenária no aprezentasaun kandidatura ba eleisaun prezidente PN.

Nia sekuénsia mak parte dahuluk, abertura traballu husi prezidente sesante, ino nasionál, intervensaun prezidente, nomeasaun sekretáriu  em exercício husi prezidente, diskusaun no votasaun projetu deliberasaun no. 1/IV konstituisaun komisaun verifikasaun podér, suspensaun reuniaun plenária no inísiu reuniaun komisaun verifikasaun podér .

Tuir mai, reinísiu reuniaun plenária (hafoin konkluzaun reuniaun komisaun verifikasaun podér ), leitura relatóriu komisaun verifikasaun podér  nian husi nia relatór sira, votasaun relatóriu komisaun verifikasaun podér  no tama ba juramentu ba deputadu sira.

Iha parte daruak, reinísiu reuniaun plenária, verifikasaun no konfirmasaun ba kandidatura sira, votasaun ba eleisaun prezidente PN proklamasaun rezultadu no fó sai naran prezidente eleitu.

Tuir mai, pasajen kadeira prezidensiál ba prezidente foun husi prezidente sesante, prezidente eleitu halo diskursu, ino nasionál no enserramentu ba reuniaun plenária.

(Jornalista: Rafy Belo)

(Editór : Manuel Pinto)

HUSIK IDA HATÁN