MOPTK Sujere ANC Prepara Lei Cyber Crime

0
76
Ilustrasaun. Google

DILI, (TATOLI) – Ministériu Obras Públikas, Transporte no Komunikasaun (MOPTK) sujere ba Autoridade Nasionál Komunikasaun (ANC-sigla portugés) ne’ebé estabelese ho dekretu lei númeru 15/2012, 28 marsu 2012 hodi prepara lei Cyber Crime (krime ne’ebé komete liuhosi komputadór).

Lei ne’e hodi asegura baze dadus nasaun nian no bele kriminilaliza, regulariza operadór no utente komunikasaun no informasaun sira.

Vise-Ministru Obra Públika, Transporte no Telekomunikasaun II, Inácio Freitas Morreira. Foto/António Gonçalves.

“Fó ona hanoin ba ANC atu sira pro-ativu inisiativa halo nusa mak prepara Cyber Crime Law ne’ebé importante ba nasaun ne’ebé mak ohin loron ita seidauk iha”, hateten Vise-ministru MOPTK, Inácio Morreira bainhira partisipa semináriu kona-ba: “A Segurança Cibernética Nacional”, iha Timor Plaza, ohin.

Nia reforsa, lei ida ne’e prioridade ne’ebé mak aas liu, ANC tenke toma ona konsiderasaun hodi bele prosesa no halo fali lei oan sira hodi regulariza operadór, utente ka ema sira ne’ebé mak uza, halo komunikasaun informasaun ruma, bele kriminaliza se laloos.

Fó ezemplu de’it, agora ne’e ema sira ne’ebé halo komunikasaun sosiál liuhusi Facebook, identidade falsu mak barak liu. Ida ne’e dezafiu, agora halo nusa mak kriminaliza.

“Tanba ne’e mak buat barak ne’ebé mak ita presiza duni. Esforsu ne’ebé mak MOPTK halo atu proteje, atu kriminaliza ita la iha lei”, governante ne’e esplika.

Entretantu, Vise-ministru Inácio Morreira akresenta katak iha fatór tolu ne’ebé mak tenke integra ba malu hodi hala’o atividade saida de’it iha área komunikasaun no teknolojia.

Fatór tolu ne’ebé mak importante hanesan rekursu umanu, lejislasaun no infrastrutura. Se hakarak proteje dadus, laiha rekursu umanu natoon, sei enfrente problema.

Lejislasaun, se labele proteje ema seluk mai ataka dadus ruma, seidauk iha lejislasaun ruma ne’ebé bele asegura oinsá halo prosesu judisiál ruma. Seluk importante mak infrastutura relevante ba área informátika no teknolojia.

Diretór ANC, António Correia ba ajénsia Tatoli hatan, ANC nu’udar reguladora komunikasaun implementa polítika governu nian.

“Polítika mai husi governu, Parlamentu Nasionál atu bele deskute oinsá define polítika ba kestaun ida ne’e”, hatutan.

Bainhira define ANC prontu ezekuta mandatu ne’ebé governu fó. “Depende ba polítika governu nian nomós tenke iha konkordánsia husi ita-nia parlamentu hodi haree ba nesesidade área setór komunikasaun nian”, akresenta.

Jornalista: Rafy Belo

Editora: Rita Almeida

HUSIK IDA HATÁN