Moeda Sentavu 200 Serkula Ona Iha Ekonomia TL

0
103
Governadór Banku Sentrál Timor-Leste (BSTL), Abraão de Vasconselos . Foto/Egas Cristovão.

DILI, (TATOLI)-Moeda Sentavu 200, ohin ofisialmente lansa ona no hahú ona sirkula iha ekonomia Timor-Leste iha fulan-setembru nia laran ho montante ne’ebé sufisiente  ho totál produsaun iha termu dólar hamutuk millaun U$6.

Lansamentu ba moeda sentavu 200 ne’e husi Primeiru-Ministru Timor-Leste, Rui Maria de Araújo, no membru Parlamentu Nasionál no membru Governu, ohin, 13 setembru 2017 iha edifísiu Banku Sentrál Timor-Leste (BSTL), avenida Bispo de Madeiros, Dili no iha tempu hanesan selebra mós aniversáriu BSTL ba da-neen nian.

Moeda sentavu 200. Foto/Egas Cristovão.

 

Governadór Banku Sentrál Timor-Leste (BSTL), Abraão de Vasconselos hatete ho sirkulasaun moeda ne’e nia sirkulasaun másiku (boot) sei akontese iha outubru 2017.

“Ida ne’e mak planu ita atu tau iha sirkulasaun durante tinan tolu oin mai. Konserteza Banku Sentrál kontinua nafatin halo avaliasaun ba nesesidade iha ita-nia ekonomia depois deside atu aumenta ita-nia montante para prodús tan sirkulasaun ou la’e? Konserteza nia denominasaun sira seluk mós iha nia importánsia no agora daudaun denominasaun ne’ebé mak domina iha sirkulasaun mak 25 centavos, 50 no 100 centavos ne’ebé domina iha ita-nia ekonomia”, Abraão informa iha BSTL, ohin.

Desizaun hodi introdús tan sentavu 200 ne’e atu permite aleinde fasilita tranzasaun iha ekonomia nomós atu hamenus presaun iha despeza ne’ebé BSTL tenke asume tanba rejime dolarizasaun ne’ebé adota.

Lei orgániku BSTL impoen obrigasaun ba Banku Sentrál atu garante fornesimentu moeda ne’ebé sufisiente iha ekonomia signifika katak Banku Sentrál tenke garante labele iha kualkér obtura iha sirkulasaun moeda iha ekonomia ne’ebé sei afeta atividade ekonómika iha país.

“Maski la’ós lei Banku Sentrál nian fó dalan atu Banku Sentrál kobre komisaun ba jestaun moeda hodi rekopera fali kustu ne’ebé nia asume maibé Banku Sentrál lota atu lahili dalan ida ne’e tanba konsekuénsia ita-nia ekonomia sei enfrenta liuliu implikasaun ba populasaun sira ne’ebé ho rendimentu ki’ik”.

Ho razaun ne’e BSTL iha tinan ida ho balun liubá, deside hodi inisia prosesu estudu ida no nia konkluzaun mak presiza introdús denominasaun boot seluk no konklui ho denominasaun sentavu 200.

“Banku Sentrál iha padraun própriu sobre prosesu ba moeda komesa husi faze estudu atu determina razaun ekonómika to’o introdusaun moeda iha sirkulasaun. Iha prosesu hamutuk 15 mak tenke kompleta iha kada prosesu”.

Razaun introdús moeda sentavu 200 mak dezde inísu 2003 to’o agostu 2017, BSTL halo importasaun ba nota amerikanu ho kustu liu millaun U$6.5. Kustu ida ne’e lainklui kustu  ba operasaun sira  hanesan investimentu ba infraestrutura atu jere moeda ne’ebé mak iha.

“Husi montante millaun U$6.4, 73% somente atu selu de’it ba kustu importasaun no repatriasaun ba nota dólar amerikanu ho denominasaun dólar ida, lima no dez. Husi númeru ida ne’e proporsaun ida boot tebes para hodi selu de’it ba importasaun ho notas denominasaun ki’ikoan hanesan um dólar, cinco no dez dólar”.

Maski kustu jestaun sei kontinua aas maibé demanda ba nota dólar amerikanu aumenta boot liu durante tinan sanulu tuirmai kompara ho períodu inísiu husi tinan 2003 to’o 2008. Dezde introdusaun moeda sentavu to’o agora Timor-Leste iha liu millaun U$16 mak sirkula ona iha ekonomia, númeru ida ki’ik kompara ho nota dólar amerikanu ne’ebé sirkula ho totál liu billaun U$1.2 bazeia ba dadus importasaun no repatriasaun ne’ebé iha.

(Jornalista : Maria Auxiliadora)

(Editór : Manuel Pinto)

HUSIK IDA HATÁN