MKIA Prepara Ezbosu Dekretu Lei Hodi Kontrolu Plástiku

0
89
Foto/google.

DILI (TATOLI)-Diretór Jerál Ambiente, Ministériu Komérsiu Indústria no Ambiente (MKIA), João  Carlos Soares informa, MKIA daudaun ne’e tenta hodi prepara halo ezbosu  dekretu lei balun ne’ebé liga ba kontrolu plástiku sira iha merkadu.

“Liuliu supermerkadu sira ne’ebé mak ita hatene katak ema kuaze loroloron tama no sai barak. Ami dezenvolve hela ezbosu  ida, hein governasaun foun la’o ita lori bá Konsellu Ministru para bele diskute no bele sai hanesan diploma ministeriál ruma para fó orientasaun ba merkadu ka loja sira bainhira ema sosa sasán, nia hili, hakarak uza plástiku ka nia bornál rasik para lori sasán,” João hatete iha Bébora-Dili, ohin.

Bainhira uza plástiku maka sei la gratuita maibé tenke selu sentavu 10 ka sentavu 20, depende ba kada plástiku ki’ik no boot, nune’e bele redús uitoan katak ema sei lakohi uza plástiku no sei uza ninia sasán rasik hodi diminui sirkulasaun plástiku ne’ebé hafo’er ambiente.

João hatete ministériu iha difikuldade ida mak agora ne’e iha ona lei lisensiamentu ambientál, lei baze ambientál, dekretu lei kontrola importasaun no esportasaun materiál kamada ozónio no foin daudaun aprova tan dekretu lei bio diversidade maibé iha parte lixu nian seidauk iha lei kona-ba jestaun lixu.

“Agora daudaun ami iha grupu taraballu ida no Konsellu Ministru aprova ona polítika jestaun lixu solidu urbanu, ne’e ami grupu traballu ne’ebé kompostu husi liña ministériu lubuk ida no Ministériu Estatál mak organiza grupu ne’e no Ministériu Komérsiu liuliu Ambiente hola parte iha ne’e, ita iha ona diskusaun lubuk ida no iha tinan 2018 ne’e ita halo ona jestaun lixu ne’ebé mak di’ak uitoan.”  Nia esplika.

Hodi hatutan, durante ne’e lixu sira ne’ebé iha Dili foti no soe no iha tempu bailoro lixu balun sunu, tanba ne’e projetu ba jestaun lixu solidu urbanu ne’e sei komesa iha tinan oin.

“Etapa primeiru halo mak agora daudaun identifika bairru ne’ebé lixu barak, tanba ne’e mak ami mós atu halo tan programa ida espasu verde para identifika ida Dili laran área ida ne’ebé mak iha sidade maibé lixu laiha jestaun di’ak entaun ita provoka sira liuhusi atividade iha bairru ka suku ne’e. Ita bele dehan ábitu ida hamoos bairru ne’e menus, ministériu balun mak sesta-sesta halo limpeza mas ida ne’e dala ida ka rua de’it mas ita hakarak semana-semana buka mekanizmu oinsá para programa ida ne’e regulár nafatin iha suku ka bairru.”

Nune’e MKIA tau iha planu katak semana-semana ekipa ambiente identifika bá uluk bairru Ministru hela no halo limpeza no halo atividade ne’ebé bele envolve komunidade sira no regulár bá fatin sira seluk no halakon mentalidade ida bainhira ema hamoos maibé seluk haree de’it.

Sobre ezbosu lei kontrolu plástiku, MKIA daudaun diskute hela ho Universidade Udayana Bali, no mós Institutu Teknologi Yogyakarta oferese mós ninia ezbosu  ho lian indonézia bainhira MKIA hakarak  dezenvolve mak  konteúdu lei ne’e bele dezenvolve hamutuk.

(Jornalista : Maria Auxiliadora)

(Editór : Manuel Pinto)

HUSIK IDA HATÁN