Ministru Saúde Husu Servisu ho Profesionál

0
227
Ministru Estadu no Ministru Saúde, Rui Maria de Araújo. Foto GPM

DILI, (TATOLI) – Governu Konstitusionál da-hituk liuhosi Ministru Estadu no Ministru Saúde, Rui Maria de Araújo husu ba ema hotu atu servisu ho profesionál no labele lori polítika partidu nian iha instituisaun governu.

“Ha’u husu ba ema hotu atu servisu ho profesionál, labele lori polítika partidu nian iha instituisaun governu, liliu Ministériu Saúde la’os fatin atu halo polítika no sokar malu tun sa’e maibé tenke hamutuk hodi presta servisu di’ak atendimentu públiku iha setór saúde”, afirma nia ba jornalista sira iha salaun ministériu saúde Kaikoli, ohin.

Nia hatutan, profesionál saúde hotu presiza hatudu profesionalizmu no hatudu dezempeñu servisu, sé mak la hatudu rezultadu di’ak, ninia parte sei ko’alia ba malu atu bele hetan substituisaun.

“Iha servisu fatin sei la iha kompromi, sé mak la hatudu rezultadu servisu di’ak, ami nain rua sei husu malu katak favór ida ita boot tenke fó fatin ba ema seluk”, akresenta nia.

Nia afirma, vontade no dever atu servi Timor-Leste la’os ema ida de’it maibé ema hotu ne’ebé fó dedikasaun atu Timor-Leste ohin loron bele sai livre no indepéndente.

Nia hakutuir, publikasaun foun ida iha 12 setembru ne’ebé ko’alia kona-ba Timor-Leste nia susesu boot tebes, publikasaun ne’e rezultadu peskiza hosi Organizasaun Mundiál Saúde (WHO-sigla ingles) kona-ba objetivu dezenvolvimentu sustentavél iha setór saúde, deklarasaun ida hateten Timor-Leste iha oportunidade di’ak tebes atu konsege atinje objetivu dezenvolvimentu sustentavél iha 2030 kompara ho nasaun barak.

Jornalista: Zezito Silva

Editora: Rita Almeida

HUSIK IDA HATÁN