Mensajen Pás Hodi Komemora Loron Pás Mundiál

0
50

DILI (TATOLI)-Pás katak labele halo diskriminasaun no dezigualdade ba ema seluk. Bainhira ita hametin pás, ita kria armonia ba ita nia nasaun, mensajen Estudante sira hodi komemora Loron 21 Setembru (aban) nu´udar loron mundiál ba pás.

Estudante Universidade Nasionál Timor Lorosa´e (UNTL), Rotário Perreira, dehan, bainhira sidadaun sira hamosu pás liuhusi hametin relasaun amizade, fraternidade no solidariedade sei kontribui ba estabilidade no dezenvolvimentu nasionál.

“ita tenke nakloke ita-nia aan no halo ligasaun ho ema hotu ne´ebé mak iha. Ita tenke halo solidariedade ba malu, ita halo diálogu bainhira mosu problema hodi mosu pás iha ita-nia sosiedade,” Rotário Perreira ba Ajénsia TATOLI, iha auditóriu AMRT (Arkivu no Múzeu Rezisténsia Timor-Leste), horseik.

Roteiro mós akresenta tan katak, ho komemorasaun loron mundiál ba pás ne´e, hanesan sidadaun namoos foin sa’e nu´udar jerasaun foun, fini ba nasaun tenke hametin nafatin relasaun hanesan timoroan no sempre buka tuur hamutuk buka solusaun ba problema ruma liuhusi dalan diálogu. Liuhosi diskute siénsia no ideia sira ne´ebé mak iha hodi nune´e fó hanoin di´ak liután ba malu kona-ba futuru nian.

Signifika ita tenke hametin pás no estabilidade iha ita-nia uma laran, iha nasaun nia laran hodi hatudu ba mundu katak ita iha pás, unidade no ba estabilidade.

Basa pás no estabilidade iha, ita bele dezenvolve ita-nia nasaun hodi ba dezenvolvimentu ida ne´ebé mak sustentável.

Raimunda Mendes Pinto da Silva, reforsa tan,  nu´udar juventude ita tenke mantein pás iha Timor-Leste, primeiru hahú husi ita-nia aan rasik.

Bainhira ita sai ba li´ur, bainhira ita hamutuk ho kolega sira iha fatin ne´ebé de´it loro-loron hasoru malu, importante mak bainhira ita halo komunikasaun ba malu, kuidadu ita-nia liafuan sira.

Paz ne´e importante tebes. Bainhira ita la kontribui ba pás, ita bele hamosu problema no konflitu ruma iha ita-nia sosiedade.

Entretantu loron mundiál ba pás ne´e komemora iha kada 21 Setembru tinan-tinan tanba ne’e inisiativa Nasaun Unida nian hodi harii iha 1981 no hahú komemora ba dahuluk iha 1982.

Iha 2002, Asembleia Nasaun Unida deklara ofisiálmente loron ne’e nu’udar loron mundiál ba pás.

Komemorasaun loron ne’e ho objetivu hodi lori ema atu sensibiliza ba nesesidade pás nian iha mundu no hodi promove aktu sira ne’ebé nu’udar rezultadu ba fin konflitu entre povu no konsagrasaun pás mundiál.

(Jornalista: Rafy Belo)

(Editór : Manuel Pinto)

HUSIK IDA HATÁN