MAP Prioritiza Atu Hasa’e Produsaun Ikan Tilapia

0
74
Tanke Ikan Tilápia mean. Foto/google.

DILI (TATOLI)-Prioridade ida husi Ministériu Agrikultura no Peska (MAP) mak oinsá atu hasa’e produsaun ikan no produtividade iha rai-laran, atu nune’e ema hotu bele hetan asesu ba ikan no dalan ida mak kaer ikan rasik iha tasi no halo kriasaun ikan iha área potensiál ne’ebé la’o daudaun ona liuliu ba ikan Tilapia.

Diretór Jerál Peska, MAP, Acácio Guterres hatete kriasaun ne’e liuliu ba ikan Tilapia  tanba komunidade barak mak gosta, nune’e hasa’e produsaun para ema hotu hetan asesu ikan ho baratu. Tanba ne’e MAP apoiu ona ikan oan ba munisípiu 12 ne’ebé prodúz  iha sentru viveiru ba komunidade sira ne’ebé iha interese atu hakiak.

“Ita mós husi orsamentu Governu nian iha tinan 2016 halo tank sira ne’e, barak mak halo kolleita ona no komunidade balun hetan benefísiu en termu hetan osan uitoan ba sira-nian nesesidade no mós komunidade sira ne’ebé hela besik iha área tenke sira estabelese, sira mós hetan ikan tanba ne’e mak ita atu halo nia kontinuidade para la’o bá oin nafatin,” Acácio informa iha Komoro, ohin.

Atu hasa’e produsaun ba ikan maka MAP iha tinan ida ne’e sei loke luan tan área ektare 20 iha Postu Administrativu Fatuberliu ne’ebé komunidade rasik mak entrega rai ba ministériu, nune’e sei estabelese tan tank  sira para bele tau ikan-oan hodi distribui ba populasaun tomak, aleinde ne’e atu aumenta produsaun ikan ba tank sira ne’ebé estabelese ona maka MAP sei fó treinamentu ba grupu sira oinsá téknika hakiak ikan nune’e bele mantein nia produsaun.

Tuir Retratu Mandatu Governu Konstitusionál Daneen iha 2015-2017 iha setór ekonómiku nian hatete iha Setembru 2016 lansa ona produsaun ikan Tilapia  no estabelese ona tenke foun Tilapia  nian hamutuk 138 iha munisípiu sira hanesan ualu iha Ainaru, 17 iha Baukau, 16 iha Bobonaru, hitu iha Kovalima, 31 iha Ermera, sanulu iha Lautein, sanulu iha Likisá, hitu iha Manatutu, 15 iha Manufahi no 17 iha Vikeke hodi abranje akuakultura 50.

“Kolleita Tilapia  ba dahuluk tonelada 2 iha fulan-Marsu 2017 ne’ebé hetan osan dolar hamutuk besik 5.960 ho kada kilo $3”, retratu ne’e dehan.

Identifika ona produtór ikan Tilapia  45 no sei estabelese tanke foun hamutuk 64 ba kriasaun ikan Tilapia  no atu halo produsaun ikan-oan 400.000, atu hetan produsaun ikan Tilapia  tonelada 389 no halo kriasaun iha bee-moos nia iha ektare sanulu, ualu ba kriasaun ikan Tilapia  no ektare rua ba ikan catfish.

“Ita sosa ona ikan tonelada 13 atu apoiu grupu 11 ka akuakultura na’in-60, estabelse viveiru bee-tasi ektare ida atubele hetan produsaun ikan milkfish kilógrama 3.200 no estabelese ektare ida Ba budu-tasi nian atu hetan produsaun tonelada 1.6”, ferere retratu.

Ministru Estadu no Ministru Agrikultura no Peska, Estanislau Aleixo da Silva hatete pontu programa MAP nian ida mak hasa’e produsaun ikan Tilapia  tanba ikan ne’e di’ak tebes ba alimentasaun hanesan proteína no kualidade alimentasaun ne’ebé povu bele hetan ho presu baratu no hetan iha fatin hotu-hotu.

(Jornalista : Maria Auxiliadora)

(Editór : Manuel Pinto)

 

HUSIK IDA HATÁN