Luta ba Dignidade Labele Para

0
293
Kay Rala Xanana Gusmão bainhira simu hosi povu iha aeroportu Nicolau Lobato. Foto Tatoli/António Goncalves

DILI, (TATOLI) – Xefe Negosiadór Delimitasaun Fronteira Marítima, Kay Rala Xanana Gusmão hateten, luta ba dignidade umana labele para tenke kontinua nafatin.

“Ita kontinua nafatain hanesan ohin loron Timor-Leste agora fó apoiu nafatin ba rai barak iha mundu ne’ebé frajeis, fraku liu ita iha demokrásia iha governasaun, iha direitu umanu, iha buat oioin”, akresenta Xanana iha konferénsia imprensa ne’ebé hala’o ohin iha sede CNRT (Conselho Nacional Resistência Timor-Leste), Bairo, Formosa.

Xanan Gusmão bainhira halo konferénsia imprensa. Foto Tatoli/Egas Cristovão

Nia haktuir, nasaun balun foin hakotu sira-nia konflitu, balun iha konflitu laran ne’ebé husu ita-nia apoiu atu ajuda sira. Ida ne’e mós ita ko’alia sai bebeik ba komunidade internasionál atu tau uluk dignidade umana. Rai boot sira tau uluk fali sira-nia kbiit katak sira iha poder. Ne’ebé problema ida ne’e, problema boot.

“Dignidade umana ne’e, respeitu rai seluk tama mós iha respeitu dignidade umana”, reforsa eis-lider rezisténsia ne’e.

Luta ba definisaun fronteira marítima durante fulan 18 nia laran la’ós de’it ba ita-nia direitu ba soberania maibé mós ba dignidade umana povu ida ne’e nian. Tinan 24 ita luta ba ita-nia rain.

Tinan 18 ita hetan soberania ba ita-nia rain katak tinan 24 haat. Agora soberania ba ita-nia tasi tinan 18.

Iha agostu 1999 ita hetan referendum ba ita-nia rain, tinan 18 liutiha iha 2017, iha 30 agostu ita hetan soberania ba ita-nia tasi.

“La fásil, iha buat hothotu ne’ebé mosu iha ita-nia vida, vida família nia laran, vida komunidade ida, iha rai ida nia laran ka iha rai ida viziñu mós nunka fásil”, afirma Xefe negosiadór hodi afirma povu Timor-Leste hanorin ona ba mundu, hahú husi beiala sira kedas.

Xanana Agradese

Xefe Negosiadór Delimitasaun Fronteira Marítima, Kay Rala Xanana Gusmão liuhusi konferénsia apela ba povu Timor-Leste tomak hakru’uk hodi agradese no fó glória ba Maromak.

“Ita fó glória ba Maromak tanba Maromak iha leten aas liubá, Nia mak halo buat hotu”, Xanana hamulak.

Nia hatutan, ita mós agradese ba rai lulik, foho lulik, agradese ba matebian sira tomak hodi ita forsa nafatin, korajen nafatin atu ita bele hametin nafatin ita-nia soberania ba luta ne’ebé besik hotu ona. Iha tempu ikus ona, iha tempu ne’ebé ami hahú iha outubru 2016, ita hetan ita-nia situasaun polítika ida ne’ebé laduun klaru.

Agradese tebes ba prezidente Repúblika, ba partidu polítiku sira hotu ne’ebé fó fiar nafatin ba nia. Agradese mós ba veteranu sira ne’ebé iha tinan hirak ne’e nia laran sira la’o hale’u Austrália hodi ko’alia ho veteranu Austrália sira hodi nune’e ita-nia asuntu ne’e labele monu ba rai.

Agradese tebes mós ba povu australianu ne’ebé amigu tebes, hodi mós fó hanoin katak buat ne’ebé ita-nia direitu ne’e ita-nia direitu.

Agradese  ba prezidente do komisáriu Haia, husi komisaun ne’e nomós membru na’in rua husi tribunál independente ne’ebé akompaña komisaun ne’e, ne’ebé serbisu maka’as, serbisu la kolen hodi buka dalan ne’ebé di’ak ba Austrália no Timor-Leste bele hetan solusaun ne’ebé di’ak.

“Klaru katak bainhira ita kuandu hakarak buat ida, buat ne’e la fásil. Maibé ha’u hakarak agradese delegasaun Austrália ne’ebé hodi ikus sira mós sente dehan ida ne’e dalan loos,” hateten eis-lider rezisténsia ne’e.

Hodi kontinua agradese mós ba ita-nia advogadu sira, tékniku sira. Sira mós hamutuk ho ita-nia gabinete fó apoiu tomák. Ho Maromak nia grasa ho matebian sira-nia tulun ho apoiu husi ema hotu, iha instituisaun barak apoiu barak, fó forsa hodi bele hasoru difikuldade ida ne’e hodi dehan katak ita hotu kontente.  “Hodi Timor-Leste nia naran ha’u fó agradesimentu ida ne’e,” nia agradese.

 23 Outubru Aprova Tratadu

Xefe Negosiadór Delimitasaun Fronteira Marítima, Kay Rala Xanana Gusmão informa katak saida mak ita hakarak ita hetan tiha ona maibé mak prosesu seidauk hotu.

“Husi agora to’o outubru, ami sei kontaktu fali, ko’alia ho komisaun atu estuda testu tratadu nian. Ami sei troka malu surat, hanoin tanba iha 19 to’o 23 outubru  mak iha enkontru ida iha Deenhaag, Olanda, atu aprova testu dehan mak ne’e ona”, informa xefe negosiadór ne’e.

Sei iha buat seluk hanesan Bayu Undan, Greater Sunrise ne’e atu dezenvolve hanusa, ne’e hotu. Tratadu ne’e kona-ba fronteira maibé depois atu buat hotu la’o di’ak sei iha aneksu oioin hodi konsidera aspetu oioin mós.

“Tanba sei konfidensiál, ha’u labele fó kedas ona fronteira ne’e nusa, komisaun mak semana seluk mai mak sei fó sai. Sira fó sai tiha mak ha’u bele esplika”, informa eis-lider rezisténsia ne’e.

Jornalista: Rafy Belo

Editora: Rita Almeida

HUSIK IDA HATÁN