Líder Bankada Hahú Diskute Komisaun Espesializada Permanente

0
264
Atividade plenária dahuluk lejislatura da-haat. Foto Antonio Goncalves

DILI, (TATOLI) – Prezidente Parlamentu Nasionál (PN), Aniceto Guterres hamutuk ho líder bankada sira, ohin iha sala konferénsia uma fukun komesa diskute komisaun espesializada permanente.

“Komisaun nia servisu fundamentál tebes iha parlamentu tanba komisaun sira mak sai instrumentu servisu iha uma fukun ne’e, tanba ne’e ohin trata ajenda ne’e atu estabelese komisaun espesializada”, tenik Prezidente PN ba jornalista sira iha uma fukun hafoin enkontru.

Nia haktuir, diskusaun ne’e sira konkorda atu koloka komisaun hitu, mantein hanesan III lejislatura no área temátika atu koloka kada komisaun ne’e bainhira iha diskusaun laran kuaze laiha problema mesmu iha diferénsia idéias oituan.

Kolokasaun partidu polítiku ida-idak nian ba kada komisaun tenke la’o tuir proporsionalidade no haree mós ba númeru kada komisaun espesializada defini ona. Númeru boot liu mak 11 deputadu ba kada komisaun maibé normalmente deputadu sia.

Nune’e nia dehan tan, husi númeru ida ne’e mak foin fahe ba proporsionalidade ba kada grupu parlamentár no 11 setembru mak sei halo deliberasaun ikus.

Eis Xefe Bankada FRETILIN ne’e akresenta, plenáriu atu hola desizaun ikus, mesmu hanesan soberanu maibé rezultadu servisu simu husi komisaun hafoin lori ba plenária.

Haktuir iha portál ofisiál parlamentu, komisaun espesializada permanante sira nia funsaun genérika atu fó apoio ba plenária hodi hala’o kna’ar ne’ebé konstituisaun fó ba PN. Sira nia Kompeténsia inklui mós análisa no investiga asuntu sira ho interesse ba nasaun, hakerek relatóriu, pareser no rekomendasaun oioin hafoin sei análisa iha plenária.

Komisaun sira mós bele bolu ministru no funsionáriu públiku hodi fó informasaun, organiza audiénsia públika iha ne’ebé públiku no representante husi sosiedade sivil hetan konvite atu apresenta sira-nia hanoin kona-ba assuntu ruma nomós apresia petisaun hirak ne’ebé ema apresenta ba PN.

Jornalista: Julia Chatarina

Editora: Rita Almeida

HUSIK IDA HATÁN