Lere Nunka Rejeita Serbí Povu

0
198
Majór Jenerál FALINTIL-Forsa Defeza Timor-Leste (F-FDTL), Lere Anan Timur.

DILI (TATOLI)—Majór Jenerál FALINTIL-Forsa Defeza Timor-Leste (F-FDTL), Lere Anan Timur no Brigadeiru Jenerál Filomeno Paixão nu´udar superior iha F-FDTL, sei ramata sira nia mandatu iha outubru tinan ne´e, maibé la rejeita bainhira estende fali sira nia mandatu hodi serbí povu.

“Nu´udar timoroan ne´ebé terus ba rai ida ne´e no ema barak mate ba rai ida ne´e, ha´u  nunka rejeita atu serbí povu no nasaun enkuantu sei moris. Bele ho atividade oi-oin maibé sempre prontu nafatin atu serbí nasaun,” Lere informa asuntu ne´e ba jornalista sira iha Palásiu Prezidente Nicolau Lobato, Bairu-Pité, Dili, kuarta horsehik, bainhira husu ninia ideia kona-ba ninia mandatu ne´ebé besik ramata ona.

Nia esplika katak agora ne´e serbisu ho lei no labele halai sees hosi lei. Tanba ne´e, nia tenik, depende desizaun hosi polítika no Governu atu estende ninia mandatu ka lae.

“Iha ailaran iha diviza karik, ha´u, Xanana, Taur no sira seluk jenerál tiha maka mai. Maibé tanba iha ailaran laiha diviza, entaun foin maka iha jenerál iha tempu ukun án. Tanba ne´e maka laiha problema ba ami,” nia haktuir.

Ba nia, kestaun estabilidade maka prinsipál. Lere informa jerasaun foun sira ne´ebé intelektuál no matenek, sukat didi´ak kbiit atu lori nasaun nia todan. Purke, tuir nia, sai líder, sira iha ona esperiénsia. Kuandu buat hotu-hotu sai di´ak, hotu-hotu túr hamutuk basa liman no hamnasa. Kuandu buat át ida mosu, ema ida de´it maka lori.

“Sé jerasaun foun iha ona kapasidade atu lori todan nasaun ninian, prontu, ita halo pasajen jerasionál,” nia haklaken. (Jornalista: Xisto Freitas)

HUSIK IDA HATÁN