Lei Anti Korrupsaun, Primeiru Ajenda Ba PLP

0
948

DILI (TATOLI)—Prezidente Bankada Partidu Libertasaun Popular (PLP), Fidelis Magalhães afirma, pozisaun PLP iha Parlamentu Nasionál sei fó atensaun liu ba lei Anti Korrupsaun nu’udar primeiru ajenda.

“Lei Anti Korrupsaun ne’e la iha duvida tanba molok eleisaun mós PLP ko’alia, agora ami sei ko’alia nafatin no sei ko’alia prioridade mak Lei Anti Korrupsaun,” Fidelis informa ba Ajénsia TATOLI bainhira hasoru malu iha uma fukun, Sesta, (08/09).

Nia hatutan, Ami sei halo reuniaun ho Prezidente Partidu Libertasaun Populár atu define fali ajenda importante sira tanba molok ne’e ami ko’alia programa prioridade lubuk ida, nune’e daudaun povu fó fiar ona no ami halo ona servisu iha té-renu atu halo saida?

Biar nune’e, importante liu ba PLP tuir Fidelis Magalhães, iha PN, PLP hakarak promove diskusaun konstrutivu no dinámiku.

PLP mós sei prepara an hodi halo proposta lejizlativa hirak ne’e no lei hirak ne’ebé importante no prioridade atu bele diskute iha meza parlamentár tanba hanesan aspirasaun povu tenke halo lei no foti desizaun polítika.

“Mezmu ami ladauk tuur hodi diskute prioridade PLP nian maibé Lei Anti Korrupsaun tama tiha ona PLP nia prioridade no ami sei alista prioridade hirak ne’ebé mak atu tutuir malu hodi bele aprezenta iha meza parlamentár,” nia hakotu lia.

(Jornalista : Zezito Silva)

(Editór : Manuel Pinto)

HUSIK IDA HATÁN