KRF Konklui Ona Proposta Autoridade Aduaneira

0
63
informa Diretór Jerál Alfándega, Minstériu Finansa, José António Fátima Abílio. Foto/Egas Cristovão.

DILI, (TATOLI) – Iha loron 1 outubru 2017, diresaun jerál Alfándega, Ministériu Planu no Finansa iha ona baze legál atu transforma ba Autoridade Aduaneira, nune’e Komisaun Reforma Fiskál (KRF) konklui ona proposta no haruka ona ba Ministru Planu no Finansa, Rui Augusto Gomes.

Bainhira ministru konkorda ho proposta ne’ebe KRF ka komisaun akompañamentu ne’ebé kompostu husi KRF, Komisaun Funsaun Públika, Vise-Ministru Finansa iha Sestu Governu, Ministru Koordenadór Asuntu Ekonómiku iha Sestu Governu, eis Ministru Planeamentu Investimentu no Estratéjiku hodi estabelese autoridade ne’e.

Diretór Jerál Alfándega, José António Fátima Abílio hatete proposta ne’e husi sekretariadu komisaun instaladora haruka ona no daudaun hein hela bainhira mak ministru halo aprovasaun ba estrutura autoridade nian.

“Automátikamente sei halo nomeasaun no hein komisaun servisu durante fulan neen para lori prosesu rekrutamentu ne’e hodi haree ba estrutura. Tanba ne’e mak iha mós kódigu aduaneiru ne’ebé mak aprova ona, nune’e husi parte kódigu aduaneiru ne’e husi Komisaun Reforma Fiskál tenke halo programa formasaun ba jestór sira atubele análiza no interpreta ba iha kódigu foun ne’e”, José hatete iha edifísu Ministériu Finansa tuan, ohin.

Enkuantu kódigu foun ne’e la’ós foun liu maibé tau hamutuk mós ho tuan ne’ebé iha dekretu lei haat to’o neen hanesan ne’e hodi junta hamutuk halo ida de’it.

KRF mós prepara ona proposta orsamentu ba autoridade foun ne’e ba iha orsamentu retifikativu nian no rekrutamentu rekursu umanu.

Autoridade ne’e sei eziste ho nia diresaun haat hanesan diresaun nasionál operasaun, diresaun nasionál ba jestaun no risku, diresaun nasionál ba konformidade aduaneira, no diresaun nasionál administrasaun no rekursu úmanu nomós sei iha unidade rekursu no asesoria jurídika, unidade auditoria interna no étika, unidade planeamentu estratéjiku relasaun internasionál no komunikasaun, no unidade informátika no estatístika ne’ebé sei iha servisu sentrál nian.

Aleinde ne’e sei iha servisu deskonsentradu iha munisípiu no fronteira hanesan alfándega iha portu no aeroportu Dili, alfándega Oekusi, Maliana, Kovalima, no Baukau ne’ebé mak sei prienxe estrutura.

Abílio esplika sobre funsionamentu servisu diresaun jerál Alfándega no Autoridade foun ne’e katak autoridade sei iha kompeténsia barak liu no kompara ho diresaun jerál prosesu balun dependente liubá ministériu hanesan orsamentu.

Bainhra ministru aprova poroposta estutura autoridade nian maka husi parte balun autoridade komesa funsiona ona no sobre orsamentu nian tenke liuhusi prosesu retifikativu.

“Funsionamentu ne’e normál hela, ita muda de’it naran ho formaliza tiha sira ne’ebé tuur iha estrutura tuir lei autoridade nian”.

Jornalista: Maria Auxiliadora

Editora: Rita Almeida

HUSIK IDA HATÁN