Kontentór 19 MAP Ne’ebé Alfándega Foti Muda Sai Ona

0
75
Diretór Nasionál Agrikultura, Ortikultura no Estensaun, MAP, Amaro Ximenes.

DILI (TATOLI)-Kontentór 19 Ministériu Agrikultura no Peska (MAP) ne’ebé Alfándega apreende (foti) tanba liu tiha ona tempu ne’ebé determina, daudaun ne’e muda sai ona husi Portu Dili bá iha Tasi-Tolu.

Diretór Nasionál Agrikultura Ortikultura no Estensaun, Amaro Ximenes informa orsamentu ne’ebé aloka atu selu kompañia SDV ka broka transfere tiha ona no osan ba selu Alfándega nian ne’e seidauk bele transfere osan ba tanba de’it husi parte Alfándega seidauk haruka nia númeru konta bankária ba aprovizionamentu, MAP.

“Husi Alfándega hatete katak SVD mak urus ida ne’e maibé ami husi Ministériu Agrikultura no Peska hakarak konta bankária husi Alfándega tenke mai para ami transfere osan tanba osan ne’e iha tiha ona, husi Ministériu Finansa aprova tiha ona. Relasaun ho ida ne’e SVD dehan sira na’in-rua mak atu koordena ida ne’e no ha’u husu sé sira koordena ami bele foti sasán mai Ministéru Agrikultura no Peska ona, agora sira seidauk fó autorizasaun,” Amaro relata iha Komoro, ohin.

Nune’e , Amaro hato’o ba Diretór Jerál Alfándega atu labele aumenta tan demurrage no husi Alfándega no MAP konkorda atu labele hasa’e tan. “Fatin ne’ebá mós Estadu nian, Ministériu Agrikultura mós Estadu, sasán ne’ebé mai ne’e mós ba ministériu ne’e mós Estadu, ne’ebé rai iha ne’ebá maibé nia orsamentu ba demurrage labelese sai ona no importante Alfándega ho SDV tuur hamutuk para osan husu MAP ne’e tranfere ba konta bankária ida ne’ebé?”.

Orsamentu ne’ebé MAP prepara atu selu ba Alfándega hamutuk mil U$31 no SVD mil U$19  aprovadu ona maibé to’o agora Alfándega seidauk haruka konta bankária ba MAP.

“Ami hasai tiha ona (kontentór 19) husi portu ona, agora muda ona bá iha Tasi-Tolu. Bainhira rai iha ne’ebá ami foti bá kedan iha terrenu tanba ne’e Estadu ba Estadu”.

Daudaun ne’e MAP hamutuk ho Alfándega muda de’it kontentór 19 bá Tasi-Tolu maibé MAP seidauk bele foti, bainhira foti ona ekipamentu sira ne’e mak sei haruka ba fatin sira ne’ebé  MAP prefere liu mak ba irrigasaun sira iha Karau-Ulun iha Same, Kasa no Bonuk iha Ainaru, Oebaba iha Suai, Bulutu iha Mantutu no Baukau, irrigasaun Maliana ida no rua.

Kontentór 19 ne’e prinxe ho ekipamentu agrikultura nian ne’ebé haruka husi nasaun Xina mai Timor-Leste ho nia manifestu dokumentu ba MAP liuliu Diresaun Nasionál Agrikultura Ortikultura no Estensaun hanesan doasaun.

Tuir Dekretu Lei Alfándega nian númeru 11/2004 iha artigu 63 bainhira sasán ne’ebé tama iha Portu Dili mak liu ona loron 90 automátika afavór ba Estadu nune’e Alfándega apreende (foti) kontentór ne’e tanba to’o iha portu Dili iha fulan-setembru 2016, nune’e iha loron 14 jullu 2017 Alfándega iha obrigasaun loke kontentór ne’e hodi hatene saida mak iha laran no kontentór ne’e nakonu ho materiál agrikultura nian.

(Jornalista : Maria Auxiliadora)

(Editór : Manuel Pinto)

 

HUSIK IDA HATÁN