KI Loke Rejistu Karteira Profisinál ba Jornalista

0
85
Konferénsia Imprensa KI. Foto: Egas Cristovão

DILI, (TATOLI) – Konsellu Imprensa (KI) sei atribui karteira profisionál ba jornalista sira bazea BA lei númeru 5/2014, loron 19 novembru, lei komunikasaun sosiál, artigu 13 no regulamentu númeru 6/2017, 21 abril, artigu 3 kona-ba titúlu profisionál.

KI loke ona ba jornalista sira iha loron 22 setembru to’o 20 outubru 2017 no halo ona prosesu, prepara kritériu ne’ebé sei aplika ba jornalista sira ne’ebé merese atu hetan títulu jornalista profisionál.

Prezidente KI, Virgílio da Silva Guterres hateten KI atribui karteira profisionál ba jornalista sira hodi hasa’e kualidade jornalista timoroan sira no fó rekoñesimentu ba sira-nia obra iha sira-nia servisu durante nu’udar jornalista liu tinan lima.

“Ami hakarak hato’o katak se iha formuláriu ne’ebé mak jornalista sira sei prenxe, rekerimentu balun kona-ba dokumentu komprovativu jornalista sira sei tau”, informa prezidente Virgílio Guterres liuhusi konferénsia imprensa iha salaun KI, Kintál-boot, ohin.

Kritériu ba aplikasaun karteira profisionál mak 1). Prenxe karta aplikasaun (prepara husi KI), 2). Kópia dokumentu identifikasaun nian, 3). Fotografia kolorida ne’ebé foin hasai, 4). Deklarasaun ho kompromísu onra katak la iha konflitu ruma tuir temi nanis ona iha lei komunikasaun sosiál no husi ne’ebé obriga atu halo tuir dever legál no étika sira ne’ebé iha ligasaun ba profisaun (prepara husi KI).

Nune’e mós, 5). Dokumentu ne’ebé prova hala’o profisaun hanesan okupasaun prinsipál, permanente no hetan remunerasaun, ne’ebé halai husi entidade ne’ebé fó servisu.

Iha realidade katak servisu durante tinan lima nia laran servisu iha mídia ka organizasaun komunikasaun sosiál ne’ebé mak la hanesan. “Atu bele komprova ida ne’e tenke iha deklarasaun ruma ne’ebé jornalista sira ne’ebé serbisu ba”, esplika.

KI nakloke to’o iha outubru nia rohan, nune’e bele avalia ona grupu primeiru husi jornalista sira ne’ebé hatama pedidu. Molok tinan ne’e hotu KI bele atribui ona kartaun profisionál.

“KI posivelmente molok atribui ba jornalista profesionál sira sei atribui mós kartaun professional hanesan karta rekoñesimentu ida ba figura eminente sira ne’ebé fó sira-nia jasa (servisu), papel importante iha jornalizmu”, akresenta.

Iha momentu hanesan, KI deside fó mós atribuisaun ba karteira onra nian ba jornalista sira ne’ebé mak mate ona, hahú husi “Balibo Five” to’o iha 1999.

“Ne’e hanesan rekoñesimentu ida ba espiritu luta, sakrifísiu, dedikasaun ba jornalizmu”, reforsa.

Entretantu, jornalista Radio Televizaun no jornalista kampus sira, KI sei la atribui karteira profisionál tanba atribui de’it ba jornalista sira ne’ebé rejistu iha KI ho estatutu editoriál, tanba RTM seidauk aprezenta nia estatutu legál.

Jornalista kampus ne’e autoridade mídia kampus nian no sira rasik mak hatene tanba ne’e hola parte akadémika nian.

Jornalista: Rafy Belo

Editora: Rita Almeida

HUSIK IDA HATÁN