KI Husu Jornalista Timoroan Prepara Aan

0
58
Ana Siqueira. Foto: KI

DILI, (TATOLI) – Konsellu Imprensa (KI) husu komunidade mídia Timor-Leste (TL) liliu jornalista sira, tantu husi imprensa, eletrónika no online  atu prepara aan hodi tuir formasaun iha Nova Zelándia no UNDP (United Nation Development Program).

“Ami halo kooperasaun ho konsellu imprensa sira iha Ázia no pasífiku no sira oferese oportunidade balun maibé husu ba imi (jornalista sira) atu prepara aan”, Diretora Ezekutiva, Ana Teresa Sequeira informa ba jornalista sira iha Fundasaun Oriente bainhira hato’o nia intervensaun, ohin.

KI koopera ho KI Nova Zelándia nian, depois liuhusi sira-nia embaixada iha Timor-Leste sei fó oportunidade ba jornalista timoroan sira.

“Oportunidade on the job training (treinamentu ho serbisu) ba jornalista sira, sei ba iha périodu ruma, fulan tolu ka fulan ne’en depende orsamentu. Aprende iha mídia ruma ne’ebé mak identifika ona no hakarak simu timoroan sira”, informa.

Ba iha Nova Zelándia, jornalista timoroan aprende ho mídia nova zelandes sira nian hodi hasa’e kapasidade. Língua inglés importante.

Iha Nova Zelándia sei la iha tradutór no fasilita fasilidade tradusaun nian bainhira formasaun la’o tanba ne’e tenke aprende ho didi’ak antes.

“Sira iha ne’ebá ko’alia inglés. Ne’ebé, aprende halo didi’ak nune’e oportunidade ne’e mai ami bele loke no imi bele aplika. Liu selesaun, imi bele hetan oportunidade ida ne’e”, reforsa.

Hafoin remata formasaun sei fila-fali mai halo kontribuisaun ba órgaun komunikasaun sosiál sira iha Timor-Leste. “Com certeza ba iha imi-nia mídia sira”, akresenta.

Hatutan tan, KI serbisu hamutuk ho UNDP kria programa intensivu, iha sesaun rua. Ida, programa critical thinking (pensamentu krítiku), oinsá bele halo jornalista hanoin no hamosu pergunta krítiku no sesaun seluk, daruak nian kona-ba jornalizmu liliu kona-ba oinsá dezenvolve istória, pergunta, entrevista no seluk tan.

“Entaun périodu ne’e, sei iha fulan neen nia laran hanesan programa intensivu ida. Bainhira ami loke oportunidade ita-boot (jornalista) sira mai, asina surat ruma hodi deklara katak imi tuir programa ne’e to’o remata”, informa tan.

Entretantu, informasaun sira ne’e KI fó sai relasiona ho preokupasaun jornalista sira nian, husi mídia oioin iha Timor-Leste bainhira kestiona kona-ba disponibilidade KI nian hodi apoiu jornalista timoroan sira hodi hala’o kna’ar ho di’ak liutan iha futuru.

 Jornalista: Rafy Belo

Editora: Rita Almeida

HUSIK IDA HATÁN