KHUNTO Koopera ho Partidu Koligasaun

0
2237
Konsileiru Superiór Partidu Kmanek Haburas Unidade Timor Oan (KHUNTO), José dos Santos Naimori Bucar ko'alia ba jornalista sira hafoin hasoru malu ho Prezidente Repúblika, ohin loraik. Foto Tatoli/Xisto Freitas

DILI, (TATOLI) – Konsileiru Superiór Partidu Kmanek Haburas Unidade Timor Oan (KHUNTO), José dos Santos Naimori Bucar hateten KHUNTO kontinua koopera ho partidu koligasaun hodi kontribui ba dezenvolvimentu nasionál.
Naimori hato’o kestaun ne’e ba jornalista sira iha Palásiu Prezidente Nicolau Lobato, Bairu-Pité, Dili, kuarta lorokraik ne’e, hafoin enkontru ho Prezidente Repúblika, Francisco Guterres Lú Olo kona-ba formasaun governu.

Naimori lakohi komentáriu kona-ba razaun sai hosi koligasaun maibé nia promete katak sei responde iha aban dader. “Ha’u labele fó komentáriu. Aban dader maka ami sei ko’alia ba públiku”, nia dehan.

Nia informa KHUNTO la importa kadeira maibé importante maka kontribui ba pás no estabilidade, nune’e bele lori dezenvolvimentu mai timoroan sira.

Iha sede Comité Central da FRETILIN (CCF), Fatuhada, Dili,  lorokraik ne’e, tékniku sira hosi Partidu Demokrátiku (PD) no FRETILIN hahú deskute kona-ba kolokasasun membru Governu ba pasta sira tuir proporsionalidade.

Entretantu, ekipa sira hosi Palásiu Prezidente Repúblika komesa ona prepara kondisaun iha Palásiu Nobre Lahane ba seremónia tomada pose membru governu da-hituk iha sesta (15/9).

Jornalista: Xisto Freitas

Editora: Rita Almeida

HUSIK IDA HATÁN