KALOHAN Atualiza Serbisu Ba PR Lú Olo

0
215
Sorumutu entre Ministru Edukasaun, António da Conceição no Xefi Estadu Lú Olo iha Palásiu Prezidente Nicolau Lobato, ohin meiudia. Imajen Mídia Palásiu PR.

DILI (TATOLI)–Ministru Edukasaun, António da Conceição alias KALOHAN ho nia asesór no tékniku sira hosi Ministériu Edukasaun (ME) sorumutu ho Prezidente Repúblika (PR), Francisco Guterres Lú Olo, hodi atualiza serbisu kona-ba ministériu asuntu sosiais no Ministériu Edukasaun ba Prezidente.

“Ohin ami aprezenta ba Prezidente Repúblika serbisu sira ne’ebé maka ami hala’o iha área saúde ne’ebé espesifikamente apoia ba iha ospitalares no distribuisaun medikamentu no edukasaun nian,” António ko’alia asuntu ne’e ba jornalista sira iha Palásiu Prezidente Nicolau Lobato, Bairru-Pité, Dili, sesta ne’e.

Nia hatutan Iha área edukasaun ninian, Nia gabinete apoiu no kontrola ba iha merenda eskolár no programa partisipasaun adultu sira nian iha eskola no moos profesór sira nia dezempeñu serbisu iha eskola.

Hanesan Ministru Edukasaun, nia haktuir, nia mós aprezenta ba Prezidente Repúblika serbisu iha área edukasaun liu-liu movimentu edukasaun ninian hanesan difikuldade sira ne’ebé profesór sira hasoru iha lian portugés. Tuir nia katak língua portugés ne’e língua ne’ebé difisil atu hanorin iha eskola sira.

Asuntu seluk, nia hatutan, orsamentu ne’ebé tinan-tinan aloka ba edukasaun ne’ebé barak halai liu-ba iha saláriu no vensimentu, tanba ne’e la to’o ba Ministériu atu mellora edukasaun.

Entretantu, Prezidente Repúblika rekoñese katak iha Timor ne’e difikuldade boot liu maka língua portugés maibé língua portugés hola parte ona identidade Timor hanesan nasaun ida.

Prezidente Lú Olo husu ba profesór sira atu haka’as an domina língua ida ne’e (portugés) tanba liuhusi língua ida ne’e maka timoroan sira bele tranzmite siénsia ba estudante sira atu estudante sira bele iha kualidade liu-tan bainhira to’o iha ensinu superiór.

Kona-ba infraestrutura sira ne’ebé maka seidauk to’o ba iha estudante sira, Lú Olo informa, nia sei rejista hela hodi komunika ba Primeiru Ministru governu foun nian atu bele inklui ba programa sira área edukasaun.

(Jornalista: Xisto Freitas)

(Editór : Manuel Pinto)

HUSIK IDA HATÁN