Jornalista Timor “Lutu” Durante Fulan Agostu-Dezembru

0
228
Ilustrasaun

DILI (TATOLI)—Prezidente Konsellu Imprensa (PKI) Virgílio da Silva Guterres alias Lamukan alerta katak, entre fulan Agostu to’o Dezembru Jornalista sira espesiál iha Timor-Leste  konsidera hanesan fulan Nakukun tanba iha fulan sira ne’e nia laran Jornalista Timoroan no Jornalista internasionál mate iha Timor, tan esforsu hakarak fó sai informasaun.

Agostu to’o Dezembru ne’e, ita komemora de’it loron jornalista sira ne’ebé mak mate,” Virgílio da Silva Guterres, fó hanoin iha salaun Konsellu Imprensa, Kintál-boot, Dili, ohin.

Prezidente Konsellu Imprensa, Virgilio Guterres. Foto mídia KI

“Portantu husi Agostu to’o Dezembru tempu atu ita hanoin jornalista sira ne’e. Ita valoriza sira nia sakrifísiu hodi kontinua hala’o servisu ne’ebé sira hatudu liuhusi kualidade iha ita jornalista nia servisu,” nia husu.

Maibé atu hatudu valorizasaun ne’e “Lamukan” fó hanoin ba jornalista sira katak, tenke iha hatudu kometimentu, dedikasaun ba servisu sira ne’e hodi buka lia loos. Jornalista sira ne’ebé mate ona iha Timor entre fulan Agostu to’o Dezembru sira mate tan sira-nia esforsu hakarak fó sai informasaun.

Entretantu husi fulan Agostu to’o Dezembru nu’udar fulan “Negro” ba jornalista sira iha Timor-Leste tanba jornalista sira barak lakon vida iha “liman kro’at” sira-nia liman hahú 1975 to’o 1999 bainhira hala’o kna’ar jornalizmu nian.

Istorikamente, iha 26 Agostu 1999, jornalista Bernardino Guterres mate bainhira hala’o nia serbisu. Iha 21 Setembru, jornalista Sander Thoenes husi Olanda hetan oho iha Bekora, Dili.

Tuir mai, jornalista Asia Press husi Indonézia, Agus Mulyawan mós mate iha 25 Setembru 1999 iha Lospalos.

Iha 16 Outubru 1975, jornalista Greg Shackleton, Tony Stewart, Brian Peters, Malcolm Rennie no Gary Cunningham mós mate, iha Balibó.

Iha 12 Novembru 1991, Kamal Bamadhaj, jornalista akadémiku ida, orijen Malázia ne’ebé eskola iha Austrália mós mate tanba kauza husi situasaun Timor nian iha tempu ne’ebá.

Iha 8 Dezembru 1975, jornalista Freelance husi Austrália, Roger East hetan oho husi militár indonézia iha ponte kais, Dili bainhira halo invazaun mai Timor iha tempu ne’ebá. Iha fulan hanesan, Francisco Borges da Costa mós mate tan konsekuénsia husi situasaun hanesan.

 (Jornalista: Rafy Belo)

(Editór : Manuel Pinto)

HUSIK IDA HATÁN