Jerasaun Foun Tenke Preparadu

0
230
Majór Jenerál FALINTIL-Forsa Defeza Timor-Leste (F-FDTL), Lere Anan Timur, hala´o reuniaun ho Xefe Estadu Lú Olo hodi ko´alia kona-ba situasaun polítika no militár iha rai laran, ohin dadér. Imajen Mídia Palásiu PR.

DILI, (TATOLI) – Majór Jenerál FALINTIL-Forsa Defeza Timor-Leste (F-FDTL), Lere Anan Timur hateten outubru tinan ida ne’e, ninia mandatu hanesan Majór Jenerál terminadu, tan ne’e, kabe ba Estadu katak sé iha nesesidade entaun bele estende maibé laiha nesesidade entaun bele hapara.

“Hakarak tau fali foun ne’e laiha problema tanba ami nia idade mós boot ona. Maibé, preokupasaun ami nian maka prepara jerasaun foun atu bele kaer ita nia kuda talin. Husu mós ba jerasaun foun, prepara án. Hametin imi nia mentalidade nasionalizmu no patriotizmu”, hatete Lere ba jornalista sira iha Palásiu Prezidente Nicolau Lobato, Bairu-Pité, Dili, kuarta ne’e, bainhira husu ninia komentáriu kona-ba kaderizasaun membru F-FDTL hodi troka superior sira iha fututu.

Nia dehan, nu’udar katuas, sira nia mandatu maka tinan lima de’it ona (2017-2022). Tinan liman nia laran ne’e, Lere hatutan, oportunidade ba joven sira atu kaer kuda talin tanba Timor nia futuru iha jerasaun foun nia liman.

“Enkuantu ami sei iha matan no ibun atu ko’alia, ami fó ami nia suporta nafatin. Ha’u komandante Forsa Armada dezde tinan 1999 to’o agora, ha’u sei lahaluha ha’u nia instituisaun Forsa Defeza, maske ha’u reforma ona. Ha’u bele la’o labele maibé kuandu iha eventu ruma iha Forsa Armada, ha’u tenke partisipa tanba ne’e kestaun morál”, katak tan.

Lere afirma iha militár laran ne’e problema laiha. Tan ne’e, tuir nia, jerasaun foun sira iha Forsa Armada nia laran tenke preparadu hodi asume responsabilidade bainhira Estadu indika sai líder Forsa Armada nian.

Jornalista: Xisto Freitas

Editora: Rita Almeida

HUSIK IDA HATÁN