IV Lejizlatura Halo “Inovasaun” Ba Komisaun Espesializada

0
138
Prezidente Parlamentu Nasionál, Aniceto Guterres. Foto Antonio Goncalves

DILI (TATOLI) – Prezidente Parlamentu Nasionál (PN), Aniceto Guterres hateten komisaun espesializada permanente ba lejizlatura IV, nafatin hanesan lejizlatura anterior ne’ebé hamutuk komisaun hitu maibé iha aliterasaun área temátikas balun.

“Aliterasaun ne’ebé ladún boot maibé hanesan inovasaun ne’ebé hakarak atu introdús iha lejizlatura IV ne’e, atu halo deferénsia uitoan ho lejizlatura ne’e liu ba,” Prezidente PN esplika iha sesaun plenária, Segunda (11/9).

Prezidente PN introdús projetu deliberasaun no 2/IV konaba konstituisaun komisaun espesializada permanente ne’ebé aprezenta husi lider bankada parlamentár sira ba meza.

Tuir projetu instalasaun komisaun kompostu hosi komisaun A trata asuntu konstitusionalizmu no justisa 11 membrus, komisaun B trata asuntu negósiu estranjeiru, defeza no seguransa 9 membrus, komisaun C trata asuntu finansas públikas 11 membrus, komisaun D trata asuntu ekonomia no dezenvolvimentu 9 membrus, komisaun E trata asuntu infraestrutura, komérsiu no indústria 9 membrus, komisau F trata asuntu edukasaun no sosiais 9 membrus, komisaun G sidadania, juventude, igualdade no kultura 8 membrus.

Entretantu Komisaun G uluk trata asuntu étika maibé agora asuntu ne’e tau hotu ona iha komisaun A. Komisaun G iha área juventude, igualdade no kultura foti husi área temátika komisaun C anterior.

Área temátika foun mak sidadania iha komisaun G, introdús sidadania atu reforsa mekanizmu partisipasaun sívika sidadaun sira nia no loke espasu ba sidadaun sira tanba demokrasia hanesan partisipativu husi sidadaun sira.

To’o notísia ne’e tun, projetu deliberasaun no 2/IV sei iha diskusaun iha nivel bankada antes hato’o ba meza no votasaun iha plenária.

(Jornalista: Julia Chatarina)

(Editór : Manuel Pinto)

HUSIK IDA HATÁN