Inklui VII Governu, Dionísio : Ha’u labele deside

0
868
Prezidenti Repúblika, Dr. Francisco Guterres Lú-Olo konversa ho Ministru Koordenadór asuntu Justisa no Ministru Administrasaun Estatal, Dionísio Babo, iha salaun VIP Aeruportu Internasionál Prezidenti Nicolau Lobato, Comoro, Dili, sesta ne´e, molok prezidenti aranka ba Malázia hodi halo tratamentu saúde. Imajen espesiál.

DILI (TATOLI)–Prezidente Komisaun Diretiva Nasionál hosi Partidu Congresso Nacional da Reconstrução de Timor (CNRT), Dionísio Soares Babo hateten kuadru sira hosi CNRT inklui iha Sétimu Governu Konstitusionál ka lae depende desizaun partidu CNRT.

“Ha’u labele deside tama iha governu ka lae. Ne’e depende ba partidu koligasaun. Karik iha desizaun ruma mai mós depende aseitasaun hosi partidu (CNRT),” Dionísio ko’alia kestaun ne’e ba jornalista sira iha Palásiu Prezidente Nicolau Lobato, Bairru-Pité, Dili, kuarta lorokraik ne’e, hafoin sorumutu ho Prezidente Repúblika, Francisco Guterres Lú Olo kona-ba partidu koligasaun asina ona akordu ba formasaun governu.

Nia dehan CNRT nia pozisaun mantein opozisaun konstrutivamente hodi kontribui ba programa dezenvolvimentu nasionál.

“Ami halo insidénsia Parlamentár lahó akordu ida. Ne’e katak apoiu ba kestaun ne’ebé liga ba interese nasionál,” Babo informa.

Kona-ba partidu koligasaun avansa ho Governu minoritária, nia hatán, ne’e desizaun prerogative Prezidente Repúblika atu deside tuir Konstituisaun, tan ne’e tenke respeita.

En-prinsípiu, Babo informa, CNRT respeita desizaun hosi partidu koligasaun ne’ebé indizita ona Primeiru Ministru no forma governu.

Iha enkontru ho Prezidente Repúblika ne’e, Prezidente Komisaun Diretiva Nasionál-CNRT hetan akompaña hosi kuadru CNRT hanesan Virgílio Smith no Jacinto Rigoberto.

(Jornalista: Xisto Freitas)

(Editór : Manuel Pinto)

HUSIK IDA HATÁN