DILI, (TATOLI) – Institutu Defeza Nasionál (IDN) serbisu hamutuk ho Universidade Nasionál Timor Lorosa’e (UNTL) konvida péritu Universidade de Lisboa (U-Lisboa), Portugal hodi fahe koñesimentu ba estudante UNTL no formandu IDN.
Diretór Finansa, Ivónio Marçal informa konferénsia ne’ebé IDN hala’o hamutuk ho UNTL ne’e ba dala rua ona ho tópiku nomós péritu ne’ebé la hanesan mós.
“Konferénsia (ohin), kona-ba kontestu estratéjiku ne’ebé liga ho téoria no realidade Timor-Leste nian”, hateten Diretór Ivónio Marçal ba mídia sira iha auditóriu Arkivu no Múzeu Rezisténsia Timor-Leste, loro-kraik ne’e.
Nia mós informa , IDN alende serbisu hamutuk ho UNTL, organiza konferénsia ida, kinta (21/9), ho péritu profesór doutór Heitor Barrão Romana, husi ULisboa, Portugal ho tópiku Timor-Leste XX: Reforçar a Valorização de Quadros “Incerteza Geopolítica e Supresa Estratégica.
“IDN la’ós konvida UNTL maibé halai liubá embaixadór sira, membru governu no alunu sira iha IDN”, relata Diretór Ivónio Marçal.
Dekana Fakuldade Direitu, Maria Ângela Carascalão hodi UNTL nia naran agradese péritu ULisboa, profesór doutór Heitor Barrão Romana ne’ebé fahe ona koñesimentu kona-ba, Timor-Leste XX: Reforçar a Valorização de Quadros “ Tópicos para Uma Análise Estratégica Contextual”.
“IDN no UNTL nu’udar entidade timoroan nian, nu’udar organizadora agradese ba ita-nia prezensa hodi fahe koñesimentu ba estudante no formandu IDN sira”, agradese dekana ne’e.
Entretantu partisipa iha konferénsia ne’e mak embaixadór Portugal iha Timor-Leste, Manuel Gonçalves de Jesus, Kolonel Falur Rate Laek, konvidadu espesiál, akadémiku inklui formandu no alumni sira husi IDN.
Jornalista: Rafy Belo
Editora: Rita Almeida
