Horta Fiar Opozisaun sei Garante Governasaun

0
304
José Ramos Horta.

DILI, (TATOLI) – Fundadór ida ba partidu Frente Revolusionariu Timor-Leste Indepéndente (FRETILIN), José Ramos Horta garante katak, partidu Kongresu Nasionál Rekonstrusaun Timor (CNRT-sigla portugés) no Partidu Libertasaun Populár (PLP) inklui partidu seluk sei kolabora ho FRETILIN.

“Ha’u fiar katak Mari Alkatiri ho Xanana Gusmão kolabora maka’as hanesan iha tinan 10 nia laran”, hateten Ramos Horta ba Profisionál komunikasaun sosiál sira iha Uma Amérika, Kampus Resende Universidade Nasionál Timor Lorosa’e (UNTL), ohin.

Nune’e mós ho PLP ne’ebé lidera husi eis-prezidente repúblika, Taur Matan Ruak. “PLP nia prezidente Taur Matan Ruak hateten ona PLP sai opozisaun konstrutiva, opozisaun responsável, la’ós opozisaun para halo de’it runguranga”, katak.

Nia konsidera Taur Matan Ruak, eis-xefe estadu maior forsa armada, eis-prezidente repúblika hatene sentidu estadu.

Premiadu nobel paz timoroan ne’e haktuir, formasaun governu la’o dadaun, prezidente repúblika sei fó pose ba primeiru-ministru, sei ko’alia iha parlamentu maske lori tempu tan prosesu ne’e normál.

“Tenke lori tempu para halo dialógu, negosiasaun didi’ak, ha’u fiar prosesu ne’e sei hetan konkluzaun”, akresenta.

Eis-prezidente repúblika, José Ramos Horta hatutan, Mari Alkatiri ema ida ho esperiénsia, kredibilidade nasionál nomós internasionál. “Bainhira ha’u fó informasaun ba embaixada sira, halo komunikasaun ba li’ur, ema hotu ne’ebé rona, sira kontente, sira admira”.

“Sira sei buka apoiu maka’as liutan ba Timor-Leste bainhira Mari Alkatiri mak kaer pasta primeiru-ministru”, akresenta tan.

Nune’e mós nia konfesa, prontu kolabora. “Ha’u haree ha’u-nia papel hanesan liliu koordenadór setór balun para uza tempu tinan lima mai ne’e fó kapasitasaun ba ministru sira seluk, ba joven sira”, dehan nia.

Tanba ne’e, bainhira inklui, semak asume pasta ministru negósiu estranjeiru iha governasaun ida ne’e, nia sei ba hanesan koordenadór ba polítika esterna, seguransa no defeza para kolabora ho sira, fó liman ho sira tan primeiru-ministru okupadu loos ho governasaun.

“Ne’ebé, ha’u iha ne’ebá para bele tulun ministériu balun la’ós ministériu hotu tan ministériu barak ha’u la hatene. Hanesan ministériu finansa no infrastrutura maibé kona-ba seguransa no defeza hatene, labarak maibé oituan hatene”, esplika.

Jornalista: Rafy Belo

Editora: Rita Almeida

HUSIK IDA HATÁN