Horta : Eleisaun Antisipada ‘No’

0
1911
José Ramos Horta.

DILI (TATOLI)—Lider Nasionál, José Ramos Horta hateten kada partidu hasai osan maka´as iha kampaña eleitorál no hetan ona fatin nu´udar deputadu, di´ak liu ida-idak hala´o nia serbisu nu´udar opozisaun ka nu´udar bankada governu nian, duké hanoin eleisaun antisipada.

 “Ha´u nu´udar lider ida ho esperiénsia tinan 40 resin, ha´u hateten ba joven deputadu sira katak ita buka aprende iha Parlamentu, halo polítika loloos iha Parlamentu, haree hadi´a saida maka bele hadi´a iha Parlamentu, haree to´ok lei sira ne´ebé uluk aprova ne´e katak lei sira ne´e di´ak ka lae ka muda lei. Ne´e deputadu sira nia papél,” Horta hato´o informasaun ne´e ba jornalista sira iha Palásiu Prezidente Nicolau Lobato, Bairru-Pité, Dili, segunda ne´e, hafoin enkontru ho Prezidente Repúblika, Francico Guterres Lú Olo.

Nia esplika Parlamentu Nasionál nu´udar fatin aprendizajen, fiskaliza asaun governu, buka serbisu hamutuk para tinan lima mai ne´e demokrasia kle´an ona, hadi´a ekonomia di´ak liu-tan, nune´e povu labele preokupadu ba iha estabilidade no seguransa.

“Ha´u nia konsellu maka halo diálogu ba beibeik iha governu, respeita opozisaun no rona ema ida-idak nia opiniaun. Sé iha elementu ruma ne´ebé iha opozisaun tau iha governu, ne´e di´ak liu-tan tanba rekursu hosi partidu opozisaun hanesan partidu CNRT iha esperiénsia kaer governu tinan sanulu,” Horta informa.

Entretantu, objetivu atuál  Ministru Estadu Konsellu Seguransa no Defeza ne´e hala´o enkontru ho Prezidente Repúblika, Dr. Francisco Guterres Lú Olo hodi informa ba Prezidente Repúblika kona-ba rezultadu partisipa reuniaun Asembleia Jerál Nasoen Unidas (ONU) iha Nova Iorke, Estadus Unidus Amérika, 18-21 Setembru 2017.

Iha enkontru Asembeleia Jerál ONU ne´e, Horta haktuir, nasaun barak inklui Sekretáriu Jerál ONU, António Guterres, louva Timor-Leste tanba prosesu formasaun governu iha Timor-Leste la´o kapa´as tebes sein iha violénsia.

(Jornalista: Xisto Freitas)

(Editór : Manuel Pinto)

HUSIK IDA HATÁN