Ha’u La Konsege Hamaran Ha’u-Nia Matabeen

1
1030

DILI (TATOLI)- “Ohin iha dalan ha’u la konsege hamaran ha’u-nia matabeen. Tanba buat ne’ebé ha’u halo la’ós ba ha’u-nia aan, maibé ba ki’ikoan sira, ba imi-nia oan sira-nia futuru.”

Xefe negósiadór delimitasaun fronteira, Kay Rala Xanana Gusmão deklara ho matabeen iha sede CNRT (Conselho Nacional da Resistência), Bairo Formosa-Dili, iha loron ne’ebé Timor-Leste mós komemora 4 Setembru, loron anúnsiu rezultadu referendum.

Eis-lider rezisténsia ne’e fó razaun katak nia matabeen  la konsege atu para tanba haree ba oan sira-nia futuru. Imi-nia orasaun ajuda ona.

“Labele agradese ba ha’u. Ha’u kontinua de’it sira ne’ebé mate nia perjuangan (luta),” nia salienta nafatin ho matabeen  nakonu.

Lider karizmátiku ne’e hateten, durante nia luta atu hetan delimitasaun fronteira marítima ho Austrália lori Timor-Leste no povu timoroan sira-nia naran.

“Ha’u lori ita hotu hodi ba defende, manan ne’e manan ba ita hotu,” esplika aman ba nasaun nian ne’ebé estadu Timor-Leste fó fiar hodi negósiu delimitasaun fronteira Marítima ho Austrália.

Entretantu, tuir observasaun ajénsia Tatoli, ho afirmasaun Kay Rala Xanana Gusmão nian, mosu situasaun ida ne’ebé emosionante tebes basá ema sira ne’ebé rona diretamente afirmasaun ne’e mesak matabeen  nakonu.

Nota mós katak iha labarik lubuk ida ne’ebé nafatin ho uniforme eskola nian hakilar hodi fó agradese ba aman nasaun nian ne’ebé sei xefe negosiadór delimitasaun fronteira Marítima ho nasaun típiku “Kangurú” ne’e.

“Obrigadu Avó Xanana, ami-nia futuru garantidu ona. Ami mak futuru nasaun nian,” agradese labarik oan sira ne’ebé rona direta mós deklarasaun maun-boot Xanana Gusmão nian ne’e.

 (Jornalista: Rafy Belo)

(Editór : Manuel Pinto)

1 COMMENT

  1. Agradese ba Aman resisténsia, Nasaun no Aman ba Negosiadór Fronteira Tasi, ami sei lahaluhan ita nia luta no esforsu tomak mai Ami. Agradese mos ba Povu Australianu sira nia apoiu durante ne’e.
    Viva Timor-Leste
    Viva ba Povu australianu sira
    Viva RDTL
    Viva K. X. Gusmão

HUSIK IDA HATÁN