Hanoin Hikas Jornalista Shander Thoenes

0
89
Jornalista Shander Thoenes. Foto: Google

DILI, (TATOLI) – Hahú husi  jornalista Greg Shackleton, Tony Stewart, Brian Peters, Malcolm Rennie no Gary Cunningham ne’ebé mate iha akontesimentu 16 outubru 1975, to’o mai Shander Thoenes tan hala’o kna’ar jornalizmu hodi hato’o lialoos ba komunidade internasionál.

Akademista Vicente Paulino. Foto: Google

“Jornalista mate faz parte ba papel ne’ebé nia asume nu’udar ema ne’ebé hato’o lialoos ba komunidade internasionál ba kauza ida ne’ebé mak di’ak tanba atu liberta povu husi funu ida naruk”, hateten péritu Siénsia Komunikasaun no Kultura, Vicente Paulino ba ajénsia Tatoli iha Kampus Liceu, Universidade Nasionál Timor Lorosa’e (UNTL), ohin.

Loron 21 setembru nu’udar loron jornalista olandes, Shander Thoenes nia mate bainhira hala’o kna’ar hodi buka informasaun.

“Ninia mate hanesan onra ida nomós bele hanesan testu ida ne’ebé marka iha istória Timor nian”, akresenta eis-fundadór no editór Buletin Kuda Ulun Lian, Maliana – Timor-Leste (1999-2001), ne’e.

Tuir nia, papel mídia importante tebes tanba ne’e dever ida konsolida Estadu direitu demokrátiku, reforsa sidadania Estadu ida nian.

“Haree husi Agenda Setting, hahú husi 1975 jornalista barak mak hala’o kna’ar ida ne’e no esforsu hodi kobre informasaun sira iha rai-laran embora ho risku ida boot”, dehan alumni Fakuldade Umanizmu, Universidade Lisboa Portugal.

Nia reforsa, jornalista mate iha Balibo (koñesidu ho Balibo Five) no seluk tan to’o mai indepedénsia, tan de’it umanizmu atu liberta povu sira ne’ebé mak la iha lian.

Hatutan, ida ne’e hanesan ezemplár, jornalista fó aan ba problema ida ne’ebé populasaun rasik sofre.

Diretór unidade produsaun no diseminasaun koñesimentu, UNTL ne’e husu ba komunidade mídia katak jornalista sira hala’o kna’ar ho “ran” no jornalista sira agora kontinua banati tuir espiritu sira ne’ebé mate hodi hala’o kna’ar di’ak liutan ho sentidu responsabilidade sosiál no imparsiál.

“Nune’e sosiedade tomak bele hola sira-nia pozisaun katak jornalista sira-nia papel importante nomós imparsiál duni”, hatutan tan.

Nia realsa sosiedade nia partisipasaun importante, tanba ne’e jornalista labele hein de’it informasaun.

Miguel Gonçalves, jornalista ida hosi radio akademika UNTL hatutan, reflesaun hodi hanoin pasadu ba kontribuisaun jornalista sira importante tebes hodi lori informasaun importante husi luta na’in sira ba mundu liuhusi testu, imajen no video.

“Ita presiza mós halo reflesaun ida ba ita-nia eroi sira ne’ebé liga ho asuntu jornalizmu nian, ita mós presiza hanoin, uluk sira koko fó sira-nia kontribuisaun, sira-nia servisu to’o mate”, afirma.

Miguel mós reforsa jornalista ne’ebé moris, bele fó netik hanoin ruma, reflesaun ruma kona-ba saida mak agora tenke halo, kontribui ba Nasaun, kontribui ba dezenvolvimentu.

Nune’e povu hodi bele asesu ba informasaun ne’ebé di’ak. Promove pás, papel mídia nafatin iha importánsia ne’ebé boot tanba influénsia boot tebes ba sosiedade.

Shander Thoenes nu’udar jornalista husi Olanda mate iha Bekora Dili, loron 21 setembru 1999 bainhira hala’o nia serbisu hodi rekolla informasaun.

Hanoin hikas Thoenes, Asosiasaun Jornalista Timor-Leste (AJTL) konvida estudante Universidade Nasionál Timor Lorosa’e (UNTL) no Universidade Orientál (UNITAL), liliu departementu komunikasaun sosiál hodi partisipa karii ai-funan no sunu lilin iha fatin akontesementu igreja Bekora nia sorin, oras tan tuku 17.00.

Jornalista: Rafy Belo

Editora: Rita Almeida

HUSIK IDA HATÁN