Governu Planeia Konstrui Edifísiu Foun STAE

0
189
Foto STAE.

DILI, (TATOLI) – Governu liuhosi Ministériu Administrasaun Estatál (MAE) hanoin ona atu harii edifísiu foun Sekretariadu Tékniku Administrasaun Eleitorál (STAE) ne’ebé sei integra iha Komisaun Nasionál Eleisaun (sigla-portugés CNE).

“Ha’u mós iha ambisaun ida atu konstrui duni edifísiu foun STAE, ha’u rasik sei lori hanoin ne’e ba Konsellu Ministru, fatin harii ne’e la’os iha fatin antigu ne’e maibé tenke integra  ba iha CNE nia sorin”, afirma Ministru MAE, Valentim Ximenes iha Kaikoli hafoin vizita dahuluk ba STAE, segunda (25/9).

Atu iha komunikasaun di’ak entre CNE ho STAE, edifísiu foun ne’e bele harii entre Ministériu Estatál no CNE nia klaran.

Goby house iha klaran nusa mak la uza hodi halo uma andár ho pizu tolu, haat eh lima atu STAE mós destakadu iha ne’eba atu iha ligasaun direitamente ho CNE”, akresenta nia.

Nia husu ba parseiru sira katak la’os atu mai fó edukasaun sívika, edukasaun votante maibé kualker dezignasaun ba konstrusaun foun STAE ne’ebé sei hala’o iha CNE nia sorin.

“Ha’u nia hanoin, ha’u nia hakarak no ambisaun rasik, CNE rai luan loos, entaun CNE ho STAE hanesan órgaun eleitorál, ida tékniku no ida supervizór nusa mak la hamutuk”, dehan nia.

Governu foun halo nia lei organika foun, atu bele integra organizasaun direita no indireita iha ministériu laran.

Enkuantu, Governu foun nia prezensa la’os atu muda maibé atu hadi’a saida mak iha ona, prezerva saida mak iha ona, saida mak halo ona maibé seidauk hotu hamutuk bele akaba ho kualidade, saida mak imi hanoin hela atu halo mezmu dimensaun seluk maibé ho objetivu ida.

Eleisaun 2017, rezultadu furak tebes, ema estranjeiru sira dehan katak aktu eleitorál, prosesu eleitorál tomak iha Timor-Leste hahú kedas hosi resensiamentu, nomeasaun polítika, kampaña eleitorál, votasaun to’o pronunsiamentu rezultadu espetakulár.

Modelu eleitorál bele sai hanesan modelu ba mundu, apezar nasaun kiik no foin ukun-án maibé bele halo modelu polítiku ida liuhosi aktu eleitorál.

Jornalista: Zezito Silva

Editora: Rita Almeida

HUSIK IDA HATÁN