Governu Agora Frajil

0
971
Foto Espesial

DILI (TATOLI)—Akompaña dinámika formasaun VII governu konstitusionál ne’ebé ohin loron partidu FRETILIN halo. Tuir Bispu Basílio do Nascimento, la’ós fasil, maibé frajil, agora fila fali ba kapasidade atu halo negosiasaun.

Governu agora frajil, ita tenke aseita realidade. Governu ida ho baze parlamentár ne’e nia frakeza ida mak ne’e, kuandu apoiu fraku governu mós hanesan la’o iha fatin, tanba hola desizaun mós tenke tetu katak monu ba ema hotu nia laran ka lae ?, maibé sei iha maioria partidária ho maioria koligasaun ne’e buat ida,” Bispu Dioseze Baukau, Dom. Basílio do Nascimento haktuir ba Ajénsia bainhira hasoru malu iha Supermerkadu Pâtéo, Kuarta (13/09) lokraik

Fasil tanba, Nia haree koligasaun ida ohin loron partidu FRETILIN halo fraku, imajina to’o dalan klaran mak membru koligasaun ida mak haksoit sai, problema oin seluk ona.

Tanba ne’e, ho realidade ohin loron nia Bispu dehan, la hatene los se mak atu governa, klaru que bele iha governu minoritáriu, maibé ida ne’e depende negosiasaun lider sira nian, maibé la’ós fasil.

Enkuantu hatán ba polítika tranzisaun jérasionál, Bibi Atan ne’e dehan, iha hanoin rua ba buat ne’e, lideransa foun hein bainhira mak lideransa tuan entrega podér no Lideransa tuan hanoin dehan, jerasaun foun seidauk prontu atu simu, maibé tenke hanoin mós katak, lei normal vida nian ne’e ita hirak ne’e la hela ba fini.

Ne’e duni buat ne’ebé importante tuir Dom. Basílio nia hanoin no nia haree, agora ne’e lideransa hotu-hotu, tantu tuan nian, no foun nian, di’ak liu hola fali referénsia seluk hodi hamutuk dehan nune’e, oinsá prepara an kona ba buat ida kapasidade.

Ho razaun katak, Ita ema bele iha idea mesak didi’ak, maibé ita la iha matenek no kapasidade atu ezekuta idea hirak ne’e mak idea sei hela de’it gaveta  no lasai.

Ne’e duni, jerasaun tuan, sei hanoin katak jerasaun foun sira iha direitu atu simu hosi jerasaun katuas sira, maibé katuas sira kuandu dehan, imi seidauk prontu, ne’e mós bele konsidera katak diskusaun ida ne’e la lori buat ida.

Nune’e di’ak liu, ita haree oinsá mak tantu jerasaun tuan no jerasaun foun kapasita sira nian an hodi hala’o dezenvolvimentu. Tantu jerasaun tuan naran bele boot, maibé naran bele konta, maibé ba atividade naran de’it la to’o, tenke iha kakutak no tenke iha kapasidade.

Basa ohin loron tenke ultra pasa situasaun ida ne’e, hodi ita ba haree katak, jerasaun foun tantu tuan haree liu mak kapasidade. Tan Kapasidade ne’e sai referénsia atu tetu ita ida-idak nia kontribuisaun ohin loron ba nasaun ida ne’e.

“Katuas sira mós tenke aprende bei-beik, nune’e mós foin sa’e sira mós hanesan, tanba buat ida aprende ne’e la haree ba idade. Aprende hodi ita bele tutan malu, ne’ebé sira ne’ebé ohin iha responsabilidade iha liman tenke tau iha ulun katak, responsabilidade la’ós dehan to’o moris rohan laek, loron ida sei hotu, depois ida-idak mós tenke hatene haraik-an hodi sukat sira nia kapasidade,” Dom Basílio haklaken tan.

(Reportajen : Manuel Pinto)

HUSIK IDA HATÁN