Garante Ezekusaun, MF Realiza Enkontru Liña Ministériu

0
263
Diretór Jerál Tezouru, MF, Rui Ferreira Magno. Foto/MF.

DILI (TATOLI)—Ministériu Finansa (MF) liuhusi Diresaun Jerál Tezouru hala’o sorumutuk ho liña ministériu, ajénsia autónomu no munisípiu sira hodi ko’alia asuntu sobre outstanding advance 2016/2017, saláriu negativu no pagamentu ne’ebé fó impaktu ba taka konta fulan nian hodi garante ezekusaun orsamentu ho di’ak.

Diretór Jerál Tezouru, MF, Rui Ferreira Magno ba TATOLI hatete enkontru ne’e planeadu iha tinan ida ne’e atu fó hanoin ba malu hodi hametin koordenasaun ho liña ministériu, ajénsia autónomu no munisípiu para garante kada ezekusaun bele la’o ho di’ak.

“Liuliu iha parte relatóriu, saláriu, ita lakohi tinan-tinan sidadaun ka funsionáriu sira mai hato’o keixa katak sira-nia saláriu tarde, ida ne’e ita lakohi, depois adiantamentu ne’e ami lakohi para ita taka konta ho adiantamentu ne’ebé boot, osan sira ne’e sirkula tiha iha ema boot sira-nia liman, sira ezekuta hotu ona tenke hatama relatóriu lalais, ida ne’e mak lei hatete osan Estadu tenke jere no ezekuta ho di’ak,” Rui informa iha Auditóriu Torre MF, Ai tarak Laran, ohin.

Kona-bá adiantamentu pendente tinan 2017 to’o períodu loron 11 Setembru husi liña ministériu, ajénsia autónoma no munisípiu sira-nian tanba problema ho relatóriu ne’ebé seidauk hatama.

“Ida ne’e mak ami atu fó hanoin ba sira tanba sira mak ezekuta ona orsamentu rasik, ita desentraliza ona funsaun pagamentu ne’e kuaze 75% ba ministériu ona entaun responsabilidade ne’e monu iha sira-nia liman, sira mak tenke ezekuta no hatama relatóriu rasik.”

Aleinde ne’e sobre saláriu negativu husi parte tezouru halo projesaun ba fulan sira tuirmai. “Foti dadus fulan-agostu, husi saláriu fulan-agostu nian ita halo pagamentu ba ministériu hotu, instituisaun autónomu sira ho munisípiu hotu ne’e, husi sira-nia dadus pagamentu salariál fulan-agostu nian ne’e ami halo projesaun ba to’o fulan-dezembru sé karik akontese iha saláriu 13 karik sira-nia orsamentu ne’e  to’o ka lato’o?”.

Nune’e mak husi parte MF partilla informasaun para haree hodi prepara aan bainhira orsamentu prevee ba tinan ida ne’e la sufisiente, sira tenke foti asaun hodi rezolve atu evita pagamentu ba saláriu tarde.

Sobre saláriu negativu nian, iha instituisaun balun mak enfrenta maibé bele rezolve tanba ida ne’e kestaun tékniku, nune’e MF koordena ho parte sira hotu no antesipa tanba ida ne’e la’ós problema.

Durante sorumutuk ne’e, iha diskusaun barak sobre kestaun saláriu husi kada instituisaun Estadu no outstanding advance ne’ebé iha nune’e MF fó solusaun hodi bele haree ba problema sira ne’e no mós no husu atu diretamente ba hasoru tékniku MF nian.

(Jornalista : Maria Auxiliadora)

(Editór : Manuel Pinto)

HUSIK IDA HATÁN