Funsionáriu Palásiu Fó Surpreza Ba PR Lú Olo

0
212
Prezidente Lú Olo hamutuk ho nia espoza selebra ninia aniversáriu ba dala 63.

DILI, (TATOLI) – Funsionáriu hamutuk ho Xefe Kaza Sivíl no Militár hosi Palásiu Prezidénsia Repúblika fó surpreza ba Prezidente Repúblika (PR), Francisco Guterres Lú Olo ne’ebé, ohin, halo tinan ba dala 63 (7 setembru 1954-7 setembru 2017).

Iha tuku 7:00, molok hala’o kna’ar, funsionáriu sira prepara dosi aniversáriu iha salaun Xina Palásiu Prezidénsia. Nune’e, bainhira Xefe Estadu to’o Palásiu, funsionáriu hirak ne’e hamriik besik odamatan boot entrada nian hodi hananu aniversáriu nian no basa liman hasoru Prezidente Repúblika ne’ebé tama ba Palásiu atu hala’o kna’ar.

Prezidente Repúblika nunka hatene katak funsionáriu no Xefe Kaza Sivíl no Militár prepara surpreza ida ne’e. Hafoin, Xefe Estadu diretamente hakat ba fatin seremónia ku’a dosi no hú lilin aniversáriu nian.

“Ha’u nia haksolok boot teb-tebes, ohin ita mai hasoru malu iha ne’e. Seremónia ne’ebé ita-boot sira prepara hamutuk ho Xefe Kaza Sívil no Militár hodi marka dala ida tan ba ha’u nia moris ne’ebé kompleta tinan 63. Hanesan ita-boot sira hotu hatene katak ita ema moris buka hatene tuir saida maka ita atu bele prevé ita nia própriu moris ne’e nian liuhusi dalan ne’ebé maka naruk teb-tebes”, dehan Lú Olo dehan liuhusi seremónia agradesementu loron aniversáriu nian.

Aman ba nasaun haktuir ninia moris liuhusi de’it dalan ninin ne’ebé sempre hetan terus oi-oin no kuaze koi-kois de’it nia haree ninia mate hamutuk ho maluk sira seluk iha ninia oin. Maibé, tuir nia, buat hotu la akontese tanba hatene katak Maromak bele husik hela balun moris para bele hatutan saida maka mate sira hodi entrega atu la’o ba oin.

“Isin no ran fakar duni iha ami nia sori-sorin, iha ami nia oin no kotuk. Hakat liu ida ne’e hodi bele to’o ohin loron mai hamutuk ho família sira no povu tomak. Ha’u sente katak iha perkursu ida ne’e, ha’u sente realizadu ba buat hotu ne’ebé maka ha’u bele halo ba ita nia rai no povu ida ne’e. Nunka hanoin para to’o ohin loron bele hamutuk ho ita-boot sira iha uma ida ne’e para kontinua serbi nafatin ita nia povu no rai”, tenik Lú Olo.

Biografia

Francisco Guterres moris iha 7 setembru 1954 iha Ossú, munisípiu Viqueque. Lú Olo nu’udar katólika ne’ebé frekuenta estudu iha ensinu primáriu Koléjiu Santa Teresinha Ossu iha 1963-1969. Hafoin ne’e, kontinua ninia estudu iha Liceu Dili no volta hikas fali ba Koléjiu Santa Teresinha nu’udar monitór eskolár iha tinan 1973.

Lú Olo hanesan kazadu ida ne’ebé kaben ho Cidália Lopes Nobre Mouzinho Guterres, oan na’in haat (Francisco, Eldino, Felezito no Dália). Involvimentu iha polítika nu’udar elementu ba Frente Revulusionariu Timor-Leste Indepéndente (FRETILIN), sai membru Komité Sentral FRETILIN (CCF-sigla portugés) no ikus sai prezidente FRETILIN.

Molok akontese invazaun Indonézia iha Timor-Leste, Lú Olo destaka ninia án nu’udar militante FRETILIN iha zona Ossú, fó sai manuál no programa polítiku FRETILIN ba populasaun sira iha ne’ebá. Iha 1975, inísiu ba ninia vida gerileiru nu’udar membru pelotaun FALINTIL iha komando Lino Olokasa nia okos, iha Rejiaun Sentru Leste.

Jornalista: Xisto Freitas

Editora: Rita Almeida

HUSIK IDA HATÁN