FRETILIN, PD, KHUNTO Avansa Ba Koligasaun

0
2087
Partidu FRETILIN, PD no KHUNTO asina dokumentu ba koligasaun forma governu iha Hotel Novo Turizmu, Lecidere, ohin dader. Imajen TATOLI/Xisto Freitas

DILI, (TATOLI) – Partidu Frente Revolusionariu Timor-Leste Indepéndente (FRETILIN), Partidu Demokrátiku (PD) no Kmanek Haburas Unidade Nasionál Timor Oan (KHUNTO) avansa ona ba koligasaun hodi forma sétimu governu konstitusionál.
Desizaun ne’e fó sai liuhusi akordu ne’ebé hala’o iha Hotel Novo Turizmu, Lecidere, Dili, segunda dader, ohin.

Antes ne’e, PD hola parte iha inkluzaun maibé tanba Partidu Libertasaun Populár (PLP) ho FRETILIN la konsege konsensu iha prezidénsia meza Parlamentu Nasionál no kompozisaun membru governu, nune’e PLP dada án hosi koligasaun hodi fó oportunidade ba PD.

Sekretáriu Jerál Partidu FRETILIN, Marí Alkatiri esplika akordu ne’ebé partidu tolu asina la’ós automatikamente koligasaun ona maibé ida ne’e hanesan inísiu ida atu forma koligasaun iha loron hirak tuir mai tanba partidu tolu ne’e presiza ajusta programa no pasta tuir partidu tolu ne’e nia interese.

Marí informa maske la’o ho partidu rua seluk maibé kontinua diálogu ho PLP no Kongresu Nasionál Rekonstrusaun Timor (CNRT-sigla portugés) tanba nasaun ida ne’e presiza partidu sira hotu nia kontribuisaun hodi harii pás, estabilidade no hala’o dezenvolvimentu.

Iha biban ne’e, Prezidente PD, Mariano Assanami Sabino hateten PD kontinua kaer nia filozofia katak ba Timor, PD prontu kontribui sein ezije kondisaun.

Nia haktuir filozofia ida ne’e PD la’ós foin maka alerta maibé dezde tempu kampaña eleitorál, no iha tinan 2011 mós PD levanta ona katak só hamutuk maka bele lori nasaun ba dezenvolvimentu.

Enkuantu, Konsellu Superior KHUNTO, José dos Santos Naimori Bucar katak, solusaun di’ak ba formasaun governu maka koligasaun no nia husu ba povu atu kolabora ho governu foun hodi harii pás no estabilidade, nune’e governu bele halo serbisu ho hakmatek hodi responde timoroan tomak nia preokupasaun.

Akordu ne’ebé partidu tolu ne’e asina ko’alia mós atu garante lista kandidatu ba prezidénsia meza Parlamentu Nasionál (PN) no estrutura prezidénsia meza PN ne’ebé sei aprezenta hosi partidu tolu ne’e.

Kandidatu prezidénsia meza sei mai hosi FRETILIN no vise sira mai hosi partidu koligasaun (PD no KHUNTO).

Aleinde ne’e, akordu mós ko’alia kona-ba kompozisaun membru governu katak tenke fahe tuir proporsionalidade no méritu.

Jornalista: Xisto Freitas

Editora: Rita Almeida

HUSIK IDA HATÁN