Forma Sétimu Governu, Fretilín Ho Aliadu Sei Asina Akordu

0
515
Adjuntu Sekretáriu Jerál FRETILIN, José Reis, ko´alia ba jornalista sira kona-ba akordu koligasaun iha CCF, ohin.

DILI (TATOLI)—Partidu tolu hanesan FRETILIN, Partidu Demokrátiku (PD) no Kmanek Haburas Unidade Timor Oan (KHUNTO) sei asina akordu koligasaun hodi forma Sétimu Governu Konstitusionál dentru loron rua nia laran (aban ou bainrua) no hafoin ne´e sei aprezenta kandidatu Primeiru Ministru ba Prezidente Repúblika hodi hetan nomeasaun.

Antes ne´e, seidauk iha akordu koligasaun entre partidu tolu maibé iha de´it akordu kompromisu ne´ebé partidu tolu asina iha 4 Setembru liu-ba hodi viabiliza kandidatu prezidente meza Parlamentu Nasionál (PN), Aniceto Guterres hosi FRETILIN no estrutura meza PN kompostu hosi partidu tolu ba eleisaun prezidénsia Meza PN ho nia estrutura iha 5-6 Setembru.

“Inisiativa hosi FRETILIN konvida fila fali partidu PD no KHUNTO para harii fila fali dokumentu koligasaun. Hotu-hotu hatene katak iha 4 Setembru liu-ba, ami asina kompromisu polítiku intendimentu ida nu´udar baze ida ba koligasaun para responde uluk nesesidade ba iha eleisaun prezidénsia meza PN,” Adjuntu Sekretáriu Jerál FRETILIN, José Reis hato´o kestaun ne´e ba jornalista sira iha hafoin reuniaun ho partidu PD no KHUNTO iha sede Comité Central FRETILIN, Fatuhada, Comoro, Dili, segunda ne´e.

Nia dehan FRETILIN entrega ona dokumentu koligasaun ba partidu rua ne´e atu estuda no sé laiha objesaun ruma, aban ou bainrua (12-13 Setembru) bele asina ona akordu koligasaun.  Dokumentu koligasaun ne´e, ko´alia liu kona-ba méritu, proporsionálidade, partilla responsabilidade ba programa, estrutura governu la boot liu no la ki´ik liu atu bele iha efisiénsia no efikás.

Iha sorumutu entre partidu tolu ne´e, José Reis haktuir, sira mós ko´alia kona-ba órgaun koordenasaun para oinsá atu funsiona koligasaun ba reuniaun ordináriu no estraordináriu sira, para konserta nafatin hanoin kona-ba iha programa sira ne´ebé koligasaun defende hamutuk iha Parlamentu Nasionál.

Nia haktuir PD no KHUNTO nia hanoin pozitivu no konstrutivu teb-tebes para bele hametin liu-tan koligasaun.

(Jornalista: Xisto Freitas)

(Editór : Manuel Pinto)

HUSIK IDA HATÁN