FEAU Vensedór ba Kompetisaun “Pop Singer” UNTL

0
29
Prémiu ba manan na'in. Foto Tatoli: Rafy Belo

DILI, (TATOLI) – Fakuldade Edukasaun Arte no Umanidade (FEAU) ne’ebé reprezenta husi Departamentu Biolojia sai vensedór ba kompetisaun “Pop Singer” ka hananu pop ho valór 2910 entre konkorente na’in 10 husi fakuldade lima ba périodu 2017 hodi sai estrela Universidade Nasionál Timor Lorosa’e (UNTL).

Joni Fransisco Gonçalves Freitas

Fakuldade sira ne’e mak hanesan Medisina no Siénsia Saúde (FMSS), Enjenária, Siénsia no Teknolojia (FEST), Ekonomia no Jestaun (FEJ) no Filozofia (FF), Agrikultura (FA) la inklui Siénsia Sosiál (FSS) no Direitu (FD) tanba la partisipa.

“Pesoalmente ha’u kontente tan sai primeiro lugar iha kompetisaun estrela UNTL nian”, hateten vensedór Joni Fransisco Gonçalves Freitas iha Kampus Sentrál UNTL, ohin.

Vensedór ne’e haktuir, molok hetan vitória ne’e liuhusi prosesu ne’ebé mak naruk. Katak, antes ne’e falla dala hitu bainhira partisipa iha konkursu hananu ne’ebé realiza iha fatin oioin liliu iha nia eskola anteriór, eskola Katólika São Pedro, nomós fatin balun iha kapitál.

“Ho vontade ne’ebé mak aas ho mehi ne’ebé mak aas, ikus mai ha’u bele sai primeiro lugar”, dehan ho orgullu.

Hodi reforsa bainhira sei dada iis, sei bele halo, bainhira iha mehi ne’ebé boot, esforsu ne’ebé mak másimu atu atinji.

Ida ne’e la’ós faze finál husi esforsu maibé hanesan pasu foun. “Ha’u pesoalmente hateten katak múzika parte ida husi ha’u-nia moris, la’ós influénsia husi ema seluk maibé hanesan talentu naturál”, akresenta konkorente ho númeru hitu.

Tan ne’e, vensedór ne’e iha esperansa katak UNTL organiza eventu kompetisaun “Pop singer” ne’e hatudu hodi katak múzika iha Timor-Leste atu la’o ba oin hahú husi edukasaun, hahú husi nível ensinu tomak.

“Nível ensinu mak hanorin oinsa atu domina nota sira oinsá atu kanta”, subliña estudante semestre neen ne’e.

Razaun tuir vensedór ne’e tanba kanta ne’e fásil no ema hotu bele maibé atu kanta di’ak ne’e ema ida rua mak bele kanta tuir kritéria no métodu.

Entretantu ekipa júri ba kompetisaun ne’e kompostu husi artista seniór timoroan sira hanesan Aida Belo, José Manuel Mesquita Freitas “Pai Zé” nomós Dedinho Marçal.

Atribuisaun prémiu oferese direta husi reitór UNTL, Francisco Miguel Martins nomós reprezentante sira husi estrutura universidade liliu Diresaun Nasionál hosi Sentru ba Konservasaun no Dezenvolvimentu Arte no Kultura (DNCCAC-sigla portugés) ho tipu taxa no seluk tan.

Jornalista: Rafy Belo

Editora: Rita Almeida

HUSIK IDA HATÁN