F-FDTL no PNTL Garante Seguransa Ba Seremónia Tomada Pose

0
261
Majór Jenerál F-FDTL, Lere Anan Timur no Adjuntu Komandante PNTL, Faustino da Costa ko'alia ba jornalista sira iha Palásiu Prezidente Nicolau Lobato, Bairu-Pité, kinta lorokraik ne'e hafoin enkontru ho Prezidente Repúblika, Francisco Guterres Lú Olo kona-ba seguransa ba tomada pose membru governu foun. Foto Tatoli/Xisto Freitas

DILI, (TATOLI) – FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) preparadu atu asegura tomada pose ba membru Governu Konstitusionál da-hitu iha Palásiu Nobre Lahane, sesta, (15/9) aban.
Informasaun ne’e hato’o hosi Majór Jenerál F-FDTL, Lere Anan Timur no Adjuntu Komandante PNTL, Faustino da Costa ba jornalista sira iha Palásiu Prezidente Nicolau Lobato, Bairu-Pité, kinta lorokraik ne’e hafoin enkontru ho Prezidente Repúblika, Francisco Guterres Lú Olo kona-ba seguransa ba tomada pose membru governu foun.

Lere hateten, nu’udar elementu seguransa no defeza, sira hakarak estabilidade nasionál hodi fó garante ba povu no nasaun hala’o dezenvolvimentu.

“Polítiku sira hala’o sira nia polítika maibé iha estabilidade nia laran. Ida ne’e maka ami informa ba Prezidente Repúblika”, eis Komandante FALINTIL haklaken.

Biban hanesan, Adjuntu Komandante Jerál PNTL, Faustino da Costa hateten forsa rua (F-FDTL no PNTL) garante katak sei laiha buat ruma maka akontese iha seremónia tomada pose membru Governu.

Seremónia tomada pose ba membru governu foun sei hala’o iha Palásiu Nobre Lahane, Dili, tuku haat lorokraik, hafoin abertura lejizlatura da-haat iha Parlamentu Nasionál.

Jornalista: Xisto Freitas

Editora: Rita Almeida

HUSIK IDA HATÁN