Estrutura Sentru Nasionál “Chega” Hato’o Programa Ba Xefe Estadu

0
183
Diretór Sentru Nasionál “Chega”, Hugo Fernandes ho nia estrutura konversa ho jornalista sira iha Palásiu Prezidente Nicolau Lobato, ohin dadér. Imajen Ajénsia TATOLI/Xisto Freitas

DILI, (TATOLI) – Diretór Sentru Nasionál “Chega”, Hugo Fernandes ho nia estrutura hala’o enkontru ho Prezidente Repúblika, Francisco Guterres Lú Olo hodi hato’o programa.

“Balun lee ona relatóriu Chega hosi Comissão Acolhimento Verdade no Reconsiliação (CAVR) nian katak iha ona implementasaun rekomendasaun balun maibé balun seidauk entaun sestu governu konstitusionál deside harii Sentru Nasionál Chega para kontinua promove no monitoriza rekomendasaun hosi Chega-CAVR”, esplika Hugo ba jornalista sira iha Palásiu Prezidente Nicolau Lobato hafoin sorumutu ho Xefe Estadu, ohin.

Nia haktuir, durante tinan 10 ne’e governu hala’o ona rekomendasaun balun maka hanesan programa bolsa ba maen, bolsa ba veteranu sira nia oan, apoiu saúde ba ema ne’ebé maka hetan saúde grave para ba liur. Programa hirak ne’e iha progresu maibé seidauk konklui hotu-hotu, presiza ajuda governu hodi kontinua implementa rekomendasaun sira ne’e.

Nia esplika Sentru Nasionál Chega harii hodi tulun governu hodi estabelese polítika (rekomendasaun CAVR) sira ne’e no implementasaun hosi rekomendasaun sira ne’e responsabilidade governu nian.

Rekomendasaun hosi Chega-CAVR kuaze 200 maibé balun ne’ebé importante liu governu implementa dadauk ona maka hanesan Harii Instituisaun Memória (Sentru Nasionál Chega), serbisu hamutuk ho Governu Indonézia hodi buka tuir timoroan sira ne’ebé lakon durante funu, rekomenda Governu atu fó formasaun ba Polísia Nasionál Timor-Leste atu evita violasaun direitu umanu bainhira atua problema no fó apoiu ba vítima sira.

Jornalista: Xisto Freitas

Editora: Rita Almeida

HUSIK IDA HATÁN