ESHANA Hakbiit Koñesimentu ho KomSos

0
44
Foto: Estudante Hadomi Natureza (ESHANA),

DILI, (TATOLI) – Estudante Hadomi Natureza (ESHANA), husi Fakuldade Ekonomia no Jestaun (FEJ), Universidade Nasionál Timor Loros’ae (UNTL) organiza formasaun komunikasaun sosiál hodi hakbiit koñesimentu rekolla dadus nian, liliu kona-ba oinsá entrevista, halo observasaun no redasaun informasaun.

João Francisco Ruas ne’ebé  hola parte ba atividade aventureiru no hadomi natureza kontente ho formasaun ne’e.

“Liuhusi formasaun ne’e, bele ajuda ami halo notísia, fó sai informasaun kona-ba moris, realidade komunidade sira nian”, partisipante semestre neen ne’e akresenta ba Tatoli iha FEJ Kampus Resende, UNTL, foin lalais ne’e.

Atividade ne’e hodi hatan ba difikuldade ne’ebé durante ne’e hasoru atu oinsá rekolla informasaun.

Ho formasaun ne’e, estudante departamentu siénsia ekonomia espera ba oin, materia sira ne’ebé sira hetan sei utiliza duni no fiar katak aumenta koñesimentu hodi rekolla dadus.

“Liliu hodi dezenvolve komunidade no ajuda moris komunidade nian iha baze”, hatutan tan.

Partisipante seluk, Maria Pinto hateten formasaun ne’e maske oituan maibé valór tebes tanba hetan koñesimentu no konsidera formasaun ne’e sai hanesan esperiénsia ida ba ESHANA.

“Ami bele iha koñesimentu kona-ba área komunikasaun sosiál nian. Sai hanesan mós parte importante ida mai ami”, dehan estudante departamentu turizmu, komérsiu  no indústria ne’e.

Entretantu formasaun ne’e rasik fasilita husi alumni komunikasaun sosiál UNTL sira no halo abertura husi prezidente ESHANA nian, Joel Manuel Freitas Soares, estudante livre teória ida iha FEJ, UNTL.

Jornalista: Rafy Belo

Editora: Rita Almeida

HUSIK IDA HATÁN