Empreza 45 Notifikadu Selu Koima

0
131
Koordenadór AIFAESA, Abílio Oliveira Sereno. Foto/Egas Cristovão.

DILI, (TATOLI) – Koordenadór Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), Abílio Oliveira Sereno informa kompañia 45 notifikadu ona selu koima no totál koima kobrada husi empreza ne’e hamutuk mil U$46.000.00.

Abílio hatutan prosesu kontra ordenasaun ne’ebé tama iha AIFAESA hamutuk 365 ne’ebé sei haree kona-ba auto hodi hato’o ba inspetór sira hodi fó koima no iha prosesu ne’e kompañia 45 mak hatama ona koima no husi empreza ne’e ida mak selu koima mil U$2000 no seluk selu mil U$1000.

“Ami submete ba Ministériu Públiku tanba sira lakumpri notifikasaun para selu koima, kuandu lakumpri ami konsidera tuir kódigu penál nia falta obediénsia ba autoridade tan ida ne’e mak kompeténsia para apresia kestaun kriminál ne’e, ami fó ba Ministériu Públiku. Até agora prosesu 19 mak Ministériu Públiku haree no ida ne’e primeira vez para haree hodi obriga tuir lei atu infratór sira tenke selu”, Abílio informa ba TATOLI iha Matadouru, ohin.

Aleinde ne’e AIFAESA mós hatún despaxu hodi taka provizóriu atividade empreza rua ne’ebé halo produsaun tempe durante fulan tolu no foin daudaun liuhusi inspesaun ne’ebé halo deskobre empreza jeladu (ice cream)  ne’ebé halo produsaun  ice cream hodi distribui ba Dili tomak.

“Deskobre katak nia laiha lisensa, nia fatin ne’ebé halo produsaun laiha ijiene para bele justifika produsaun. Tan ne’e ami husu ona ba entidade ne’ebé fó lisensa mak MCIA no SERVE para sira labele estende tan nia lisensa ne’ebé mate ona. Ami mós notifika nia na’in para taka ona, fó prazu loron 90 para nia hadi’a nia fatin produsaun”.

AIFAESA mós sei prepara workshop boot ida iha loron 21 setembru iha Timor Plaza hanesan pontu partida ba lansamentu kampaña kona-ba rejime foun kontrolu regra aplikasaun tabaku iha Timor-Leste.

Oradór iha semináriu ne’e sei mai husi AIFAESA, Alfándega, Ministériu Saúde no advogadu ne’ebé halo produsaun kona-ba tabaku.

“Tanba kampaña tabaku ne’e, dekretu lei 14 ne’ebé regula rejime kontrolu tabaku sai iha tinan  kotuk, liu tiha ne’e lahalo buat ida, tanba ne’e Primeiru-Ministru rasik toma inisiativa konvida Ministériu Saúde, Ministériu Komérsiu no Turizmu, konvida mós AIFAESA para bá ko’alia. Primeiru-Ministru rasik hatún despaxu mai ami fó kompeténsia para ami bele halo kontrolu tabaku hamutuk ho sira ou bele halo mesak”.

Jornalista: Maria Auxiliadora

Editora: Rita Almeida

HUSIK IDA HATÁN