Embaixadór Japaun Remata Ona Mandatu

0
47
Embaixadór Japaun ba Timor-Leste, Eiji Yamamoto, despede Prezidente Repúblika, Dr. Francisco Guterres Lú Olo. Imajen Mídia Palásiu PR.

DILI, (TATOLI) – Embaixadór Japaun ba Timor-Leste, Eiji Yamamoto hala’o enkontru ikus nian ho Prezidente Repúblika, Francisco Guterres Lú Olo no segunda, (25/9) despede ona Xefe Estadu.

Embaixadór Eiji apresia tebes suporta no amizade hosi Prezidente Repúblika durante nia hala’o kna’ar iha Timor-Leste no nia espera Governu rua sei hametin liu-tan relasaun bilaterál iha futuru.

Eiji haktuir durante ne’e Governu Japaun liuhusi Embaixada Japaun iha Timor sempre kolabora ho Governu Timor-Leste hodi dezenvolve Timor iha área agrikultura hanesan halo irigasaun ba natar sira iha Laleia (Manatuto) no Vemasse (Baucau), tinan-tinan lori joven timoroan sira vizita Japaun hodi kuñese kultura joponeze no sel-seluk tan.

Nia hatutan kooperasaun entre nasaun rua ne’e sei la kotu no embaixadór foun ne’ebé mai sei hatutan serbisu barak ne’ebé seidauk hala’o iha embaixadór tuan nia mandatu. Embaixadór foun sei hala’o nia kna’ar iha inísiu outubru tinan ne´e.

Opotunidade ne’e, Xefe Estadu entrega rekordasaun nu’udar jestu apresiasaun misaun Embaixadór Japaun durante tinan tolu , hahú hosi tinan 2015 to’o 2017.

Prezidente Lú Olo espera ho prezensa embaixadór foun iha Timor-Leste bele iha relasaun serbisu ne’ebé di’ak ho órgaun Estadu sira iha Timor-Leste.

Jornalista: Xisto Freitas

Editora: Rita Almeida

HUSIK IDA HATÁN