Efisiénsia Hodi Tau Matan ba Osan Estadu Nian

0
308
Ministru Planu no Finansa, Rui Augusto Gomes. Foto/Egas Cristovão.

DILI (TATOLI)–Programa prioridade balun husi Ministru Planu no Finansa, Rui Augusto Gomes mak efisiénsia hodi tau matan ba osan Estadu nian ho di’ak, ba patrimóniu Estadu no oinsá estimula ekonomia ne’e bá oin no nia benefísiu ne’e ba povu.

“Kriasaun empregu no ida ne’e la’ós buat foun, agora oinsá mak ita aselera buat balun ne’ebé presiza aselera para ita-nian povu mós sente benefísiu dezenvolvimentu ne’e rasik,” Rui informa ba jornalista sira iha Palásiu Nobre Lahane, ohin, hafoin enkontru Konsellu Ministru nian remata.

Rui hatete atu ko’alia sobre programa ministériu nian seidauk bele tanba programa Governu Konstitusionál Dahituk rasik nian mós seidauk tanba sei lori tiha lai ba Parlamentu Nasionál iha loron 15 Novembru 2017.

Kona-bá planu no programa ba Ministériu Planu no Finansa nian katak daudaun ne’e nia sei estuda no halo kontaktu ho ema no vizita fatin sira depois mak bele haree.

“Ha’u-nia planu konserteza iha maibé ita tenke ajusta ba planu ida boot ne’ebé mak sei mai iha dia 15 Novembru, ita sei aprezenta iha Parlamentu, husi ne’ebá mak ita haree, sé Parlamentu aprova tiha planu ida ne’e entaun ministériu ida-idak sei halo nia planu atu ajusta ba planu boot ne’e.”

Enkuantu husu sobre ezekusaun Orsamentu Jerál Estadu, Rui hatete ezekusaun atraza uitoan tanba iha mudansa ba ministériu no espera iha ikus tinan 2017 ne’e.

(Jornalista : Maria Auxiliadora)

(Editór : Manuel Pinto)

HUSIK IDA HATÁN