Deputadu Bianco Husu Autoridade Telekomunikasaun Hatan Frekuénsia RTTL E.P

0
289
Logo RTTL.EP

DILI, (TATOLI) – Deputadu hosi bankada Frente Revolusionariu Timor-Leste Indepéndente (FRETILIN), Antoninho Bianco husu ba autoridade telekomunikasaun atu hatan ba Frekuénsia Radio Televizaun Timor-Leste Empreza Públika (Rttl E.P) kompara ho Grupu Média Nasionál (GMN) tanba povu iha iha rai laran kuaze la asesu.

“Situasaun ne’e grave, autoridade ne’ebé fó lisensa ba Radio Televizaun privadu hirak ne’e tenke bolu mai parlamentu atu husu responsabilidade”, kestiona Bianco iha plenária Parlamentu Nasionál, ohin.

Nia hatutan, Rttl E.P ho radio televizaun privada ho frekuénsia iha ámbitu pre-kampaña to’o agora, populasaun kuandu loke Rttl E.P kuaze iha teritóriu laran la hetan maibé hetan de’it mak Grupu Média Nasionál (GMN).

Nia mós kestiona frekuénsia radio televizaun privadu bele domina empreza públiku, tenke ezije ba responsabilidade autoridade telekomunikasaun ne’ebé kontrola frekuénsia atu sira bele mai hatan iha parlamentu.

Populasaun sira la hola parabola signifika la asesu informasaun, tanba ne’e, Rttl E.P tenke garante informasaun ba públiku liuhosi kanál ne’ebé apropriadu, enkuantu iha konsitituisaun garante informasaun ba populasaun sira.

“Kuaze iha munisípiu hotu, populasaun sira lahetan asesu informasaun liuhosi Rttl E.P no tenke loke parabola mak foin hetan”, hatuan tan. “Ha’u sujere katak Parlamentu Nasionál tenke rekomenda ba governu hodi husu responsabilidade ba autoridade ne’ebé fahe frekuénsia, se la’e bolu mai iha ne’e hodi hatan”.

Jornalista: Zezito Silva

Editora: Rita Almeida

HUSIK IDA HATÁN