CNRT Husu Governu Halo Mudansa Ho Razoavel

0
334
Deputadu Jacinto Rigoberto

DILI (TATOLI) –Bankada CNRT husu ba sétimu governu konstitusionál bainhira hanoin atu halo mudansa ruma iha governasaun tenke bazeia ba fundamentu ne’ebé razoavel atu nune’e la bele prejudika prosesu implementasaun Dezenvolvimentu.

Liuhosi deklarasaun Deputadu Jacinto Rigoberto, afirma, governasaun ida-idak mai ho ninia polítika  hodi oferese buat di’ak ba povu nia moris maibé mudansa ruma tenke bazeia ba fundamentu ne’ebé razoavel atu labele prejudika prosesu implementasaun programa no rezultadu dezenvolvimentu.

“Bankada CNRT hare katak mudansa tinan finanseiru sei afeta jestaun finansas públika ne’ebé sei implika ba kustu, tempu no lei sira mak hanesan lei orsamentu no jestaun finanseira, lei fundu petrolíferu, lei tribunal das kontas, rejimentu Parlamentu Nasionál nian no dala ruma mós bele afeta ba revizaun lei tributária,” Jacinto Rigoberto fó sai iha plenária, horseik.

Nia dehan, lei sira ne’e sei halo duni revizaun ba futuru hodi responde ba nesesidade estadu nian maibé tenke liuhosi revizaun ida komprensivu la’ós reeve atu responde de’it ba mudansa tinan finanseiru.

Mudansa tinan finanseiru mós bele fó impaktu seluk ba sistema jestaun finansas públika, kobransa ba reseita, kustu, tempu, liu-liu bele atraza mós informasaun ba públiku iha portal transparénsia.

Lolos lá presiza  halo mudansa ba tinan finanseiru tanba sei iha orsamentu duodecimo sufisiente atu sustenta mákina estadu ba durasaun tempu fulan rua nia laran, nune’e bele fó tempu ba estrutura governu foun hodi prepara planu orsamentu foun.

Nune’e mós ministériu finansas iha pasadu iha kapasidade sufisiente hodi prepara proposta ba orsamentu rektifikativu no orsamentu jerál estadu (OJE) hodi debate iha Parlamentu Nasionál (PN).

Uluk tinan finanseiru ninian sempre hahú iha 1 Juñu to’o 31 Jullu ne’ebé muda ona hosi IV governu konstitusionál ba 1 Janeiru to’o 31 Dezembru, bazeia ba fundamentu forte katak durante tinan finanseiru, governu presiza tempu sufisiente hodi halo preparasaun dokumentu kontratu no halo tender ba projetu sira nu’udar indikadór prinsipál husi prosesu ezekusaun orsamentu estadu nian.

(Jornalista: Julia Chatarina)

(Editór : Manuel Pinto)

 

HUSIK IDA HATÁN