CCF Deside Marí Alkatiri Ba Primeiru Ministru

0
1551
Reuniaun membru CCF hodi eleje Sekretáriu Jerál Partidu ba kargu Primeiru Ministru, ohin meiudia.

DILI (TATOLI)—Membru Comité Central da FRETILIN (CCF) hamutuk ema na´in 90 (100%) ho konsensualmente eleje ona Sekretáriu Jerál FRETILIN, Dr. Marí Alkatiri ba Primeiru Ministru (PM) Sétimu Governu Konstitusionál.

Desizaun ne´e hakotu liuhusi reuniaun CCF ne´ebé hala´o iha Sede CCF, Fatuhada, Comoro, Dili, Domingu (10/9) tuku 11:00-18:40 Otl.

Razaun membru CCF indika Marí Alkatiri ba Primeiru Ministru tanba estatutu CCF defini katak Sekretáriu Jerál Partidu automátikamente okupa kargu Primeiru Ministru bainhira partidu manán iha eleisaun jerál.

Razaun seluk, Marí nu´udar figura ida ne´ebé jestór di´ak ba governasaun no iha pezu polítika. Tuir membru CCF katak indikadór ne´ebé eis Primeiru Ministru ne´e hatudu ona maka konsege halo jestaun di´ak ba Primeiru Governu Konstitusionál iha altura ne´ebá (2002-2007) no Zona Ekonomia Espesiál Sosiál Merkadu (ZEESM), 2015-2017.

Maske nune´e, ba jornalista sira, Marí deklara katak nia orgullu ho membru CCF nia desizaun maibé nia husu fó tempu loron ida ba nia (to´o segunda aban) atu nia deside ba PM ka lae. Maibé, nia garante katak iha Tersa (12/7), FRETILIN ho nia aliadu sira sei aprezenta Primeiru Ministru ba Prezidente Repúblika, Dr. Francisco Guterres Lú Olo.

“Ha´u sai PM ka la sai PM, dezenvolvimentu sei ba munisípiu hotu-hotu durante tinan lima nia laran (2017-2022),” Marí informa.

Iha biban ne´e, nia mós dehan, iha tinan lima nia laran nia hakarak halo tranzisaun jerasionál iha FRETILIN nia laran. “Ema hotu hanoin dehan ha´u gosta tebes sai PM, satán CCF tomak apoiu ha´u. Maibé, ha´u hakarak FRETILIN hahú agora ba oin prepara dadauk ona jerasaun foun,” Marí haklaken. (Jornalista: Xisto Freitas)

HUSIK IDA HATÁN