BSTL Lansa Ona Estratéjia Nasionál Ba Inkluzaun Finanseira

0
92
Governadór Banku Sentrál Timor-Leste (BSTL), Abraão de Vasconselos. Foto/Egas Cristovão.

DILI, (TATOLI) – Banku Sentrál Timor-Leste (BSTL) lansa ona Estratéjia Nasionál ba Inkluzaun Finanseira hanesan planu ida ne’ebé dezenvolve hodi aliña ho Planu Estratéjiku Dezenvolvimentu Nasionál (PEDN) 2011 to’o 2030 nian.

Governadór Banku Sentrál Timor-Leste (BSTL), Abraão de Vasconselos hatete Planu Estratéjia Nasionál ba Inkluzaun Finanseira ne’e  nia dezenvolve aliña ho master plan ne’ebé mak BSTL lansa iha tinan 2014 no estratéjia planu sira iha laran ne’e aliña ho PEDN.

“Planu ida ne’e halo ba tinan 2017 até 2022. Iha laran ne’e deskreve objetivu lubuk ida mak tenke atinje durante períodu ida ne’e no Banku Sentrál iha konfiansa katak programa sira ne’ebé aprezenta iha ne’ebá bele implementa mezmu maioria la’ós iha Banku Sentrál nia responsabilidade mas Banku Sentrál fiar ho entuziazmu sira ne’ebé mak Governu no Parlamentu hatudu iha ikus ne’e, fiar ida ne’e sei bele implementa iha tinan lima nia laran”, Governadór hatete iha edifísiu BSTL, horisehik.

Tuir website ofisiál BSTL sobre dokumentu inkluzaun finaseira https://www.bancocentral.tl/…/estrat-jia-nasion-l-ba-inkluz…nian ne’ebé TATOLI asesu katak atu hametin inkluzaun finaseira sei halo nasaun dezenvolvidu, no hanesan Timor-Leste importante tebes tanba inkluzaun finaseira ne’e bele habiban timoroan tomak atu asesu ba servisu finanseira ne’ebé importante liu hodi hakmaan moris loroloron nian.

“Inkluzaun finanseira sei lori mudansa pozitivu boot ba timoroan tomak nia moris di’ak liuhusi finanseira no sósiu-ekonómiku, tanba ne’e konsidera hanesan baze ida hodi apoiu no asegura nasaun nia estabilidade finanseira. Ho dalan ida ne’e, maka Governu kontinua promove nafatin inkluzaun iha setór finanseira, nomós ida ne’e sei sai prioridade boot ba aban-bainrua”, Abraão dehan.

Tuir dokumentu inkluzaun finanseira ne’ebé lansa husi BSTL iha loron 8 Agostu 2017 ne’e relata sobre situasaun atuál finanseira iha Timor-Leste nian katak sistema finanseira Timor-Leste konstituída husi BSTL, banku komersiál lima, instituisaun ba depózitu ida, kompañia seguru jerál tolu, operadór ba kréditu no mikro finansa no grupu poupansa nomós sistema informál empresta osan. BSTL nu’udar órgaun prinsipál sistema finanseira nian, tau importánsia boot ba dezenvolvimentu inkluzaun finanseira iha Timor-Leste.

BSTL introdús ona medida atubele moderniza sistema pagamentu, lansa ajénsia bankária, projetu pilotu karteira eletróniku (e-wallet), dezenvolve asesu ba kréditu, fó-formasaun PMEs, nune’e mós implementa programa literasia finanseira balu no regula protesaun ba konsumidór sira. Ida-ne’e hatudu momoos daudauk mudansa di’ak iha promosaun ba inkluzaun finanseira.

Iha 2016, munisípiu hotu-hotu iha Timor-Leste laran tomak hetan ona fatin asesu ba servisu finanseira. Liuhosi análize ida-ne’ebé kle’an ba dadus sira hatudu katak postu administrativu barak liu, pursentu 88 hosi postu administrativu 65, mak asesu ona ba servisu finanseira.

Instituisaun bankária sira, liuliu, intensifika sira-nia objetivu finál ba servisu finanseira iha rai-laran, ne’ebé hatudu katak, númeru asesu ba banku aumenta hosi 198 iha 2009 ba 484 iha 2016, iha fali instituisaun la’ós bankária sira kontinua fó nafatin servisu komplementár iha área hirak ne’ebé banku laiha. Iha Timor-Leste, daudauk-ne’e, populasaun adulta besik pursentu 64 mak utiliza servisu finanseira, no ema barak liu husi persentajen ne’e mak iha ona konta bankária rasik iha instituisaun bankária sira.

Jornalista: Maria Auxiliadora

Editora: Rita Almeida

HUSIK IDA HATÁN