Bankada KHUNTO Husu PN Define Krime Hafoin Aplika Imunidade

0
49
Atividade PN. Foto Relasaun Públika PN

DILI, (TATOLI) – Vise Xefe Bankada Kmanek Haburas Unidade Nasionál Timor Oan (KHUNTO), Olinda Guterres liuhosi deklarasaun polítika iha plenária, segunda (25/9), husu atu define krime hafoin aplika imunidade ba deputadu sira.

“Liafuan imunidade iha kontekstu artigu ne’e (artigu 8 konaba imunidade) jeneralidade liu, deputadu balun bele uza imunidade ne’e atu aplika ba kondisaun sériu hanesan korupsaun, mal administrasaun, abuzu poder nomós ba krime seriu seluk tan”, afirma.

Hodi dehan, tuir loos imunidade ne’e so bele aplika ba kazu sivil ne’ebé enkuadra iha kódiku sivil no aplika de’it wainhira deputadu sira halo kna’ar durante sira nia funsaun deputadu no labele aplika ba kazu krime ne’ebé define ona iha kódiku penal.

“Tuir loos regra husi imunidade ne’e la’os atu proteje kriminalidade justisa maibé imunidade ne’e atu proteje deputadu sira atu labele hetan re-estrusaun ruma bainhira sira hala’o sira nia kna’ar”, katak.

Akresenta tan, sekuandu la define loloos imunidade ba deputadu ka membru governu sira, entaun sei kontinua enkoraja no fó dalan atu pratika krime.

“Parlamentu tenke obrigatoriu hasai imunidade ba deputadu bainhira tribunál hato’o sivismu ida relasiona ho krime ruma ne’ebé hakanek RDTL nia kodiku penál”, tenik tan.

Nia husu atu aplika regra todan liu ba deputadu ne’ebé aplika krime dulozu ne’ebé definie ona iha kodiku penál no krime korupsaun atu reforsa lei anti korupsaun no hametin konstituisaun  atu aplika ba ema hotu.

Timor-Leste ne’e estadu direitu demokrátiku, nia afirma, PN no governu hala’o sira nia kna’ar iha lei nia okos no sidadaun hotu hanesan iha lei nia oin, inklui mós deputadu sira.

Iha parte hanesan xefe bankada Frente Revolusionariu Timor-Leste Indepéndente (FRETILIN), Francisco Branco konsidera hanesan perrogativa ida atu asegura membru PN sira ho liberdade ne’ebé luan, hodi deputadu sira bele ezerse sira nia funsaun ho di’ak, no labele tauk bainhira ko’alia.

Hodi akresenta, presiza koopera bainhira pedidu ruma husi poder judisiál ho baze no presiza hadia kestaun ne’e atu sidadaun sira labele sente katak iha sidadaun primeira klase no sidadaun segundu klase.

Jornalista: Julia Chatarina

Editora: Rita Almeida

HUSIK IDA HATÁN