Aumenta Produsaun Ai-Han Prioridade MAP Nian

0
36

DILI, (TATOLI)—Ministru Estadu no Ministru Agrikultura no Peska, Estanislau Aleixo da Silva iha reuniaun Konsellu Ministru (KM), Ohin, Tersa (26/09) promete katak, iha tinan lima mai sei halo esforsu hodi hasa’e produsaun ai han iha Timor laran.

“Liuliu hanesan iha hare tanba iha difikuldade uitoan, ne’e duni ami hakarak maxima utilizasaun irrigasaun nian, batar, koto, fore-kili, fore-rai no seluk tan. Ida ne’e buat ida ne’ebé ami hanoin atu aumenta maibé ami hanoin katak batar ne’e importante tanba batar ne’e aleinde ema han no mós ba animál”, Estanislau informa iha Palásiu Nobre Lahane, ohin, depois enkontru KM nian.

Prioridade ne’e liuliu ba área produsaun ai-han nian no oinsá mak atu masimiza utilizasaun sistema irrigasaun ne’ebé iha, aproveitamentu ba Kosta Súl no agrikultura Kosta Súl sobre produsaun alimentár oinsá bele aumenta produsaun ai-han iha rai-laran.

Ba area peska nian, kontinua nafatin hakiak ikan Tilapia iha rai-laran, aleinde ne’e promove akuakultura, no mós planta industriál oinsá mak atu habelar liután reabilitasaun kafé no halo plantasaun kafé nian, aumézmu tempu haree mós ba espesiaria hanesan kraviñu, pimenta-metan.

“Ortikultura ami mós hanoin importante atu promove para ita-nia populasaun bele hetan asesu ba modo. Kona-ba pekuária kontinua nafatin servisu no atu hadi’a populasaun animál, servisu ne’ebé fó kontinuidade hanesan vasinasaun oinsá atu aumenta produsaun animál iha ita-nia rai-laran, ne’e sei lori tempu,” Estanislau esplika

Ba floresta nian mak atu habelar liután plantasaun ai-horis iha rai-laran liuliu sandalu, ai-naa, ai-saria, ai-teka hodi iha futuru bele sai fonte reseita adisional.

(Jornalista : Maria Auxiliadora)

(Editór : Manuel Pinto)

HUSIK IDA HATÁN