Aseita Misaun Ezijente, SSHD Kongratula Governu Da-hitu

0
88
Konferénsia imprensa. Foto Fundasaun Sentru Queshadip Ruak

DILI, (TATOLI) – Sirkulu Sidadaun Hadomi Dame (SSHD) kongratula governu dahitu konstitusionál ne’ebé lidera husi Primeiru-ministru, Mari Alkatiri tanba aseita ona dífisil no misaun ezijente hodi lidera destinu nasaun ne’e.

“Sentidu ne’e ami hakarak saúda aktu korajozu no responsável ba diferente órgaun partidu ne’ebé hetan votus liu iha eleisaun sira foin lalais ne’e hodi avansa ba formasaun governu”, reprezentante SSHD, Luís Sampaio kongratula liuhusi konferénsia imprensa ne’ebé realiza iha Sentru Quesadhip Ruak Taibesi, ohin loraik.

Agradese mós ba governu dahitu konstitusionál tanba fó ona resposta, oportunu ba preokupasaun ne´ebé povu sente tanba demora formasaun plataforma governativa ida.

Saúda mós ba disponibilidade partidu sira seluk nian ho asentu parlamentár hodi apoiu ba formasaun iha governu da-hitu maske iha koligasaun governativa ka maske liuhusi fasilitasaun konsensu sira hodi iha insidénsia no negosiasaun parlamentár ne’ebé viabiliza sustentabilidade no durasaun governu ne’e nian ne’ebé reprezenta povu.

Kongratula ba sivismu boot ne’ebé hatudu iha atitude no komportamentu sidadaun sira nian iha prosesu tomak eleitorál nian no hein durante andamentu ne’ebé foin liu iha semana sia nia laran ne’ebé tuir kedas eleisaun lejislativa sira.

Ho ksolok boot tebes verifika, vontade governu nian ne’ebé mak foin forma atu kontinua promove politika ida luan ba entendimentu entre partidu polítiku oioin halo tuir ezemplu tinan 15 iha demokrasia nia laran, ne’ebé halo tuir mós ba restaurasaun indepedénsia.

Espesiál liu, SSHD, destaka ba intensaun no dezafiu ne’ebé lansa ona husi governu ba sosiedade sívil atu partisipa iha rezolusaun ba problema sira iha kualidade sidadaun sira nian ka integra iha organizasaun naun governamentál sira, iha konferénsia nasionál ne’ebé koligasaun governativa hakarak atu realiza iha semana hirak oin mai, hodi define konsensu sira iha elaborasaun polítika, programa no projetu sira ba interese boot nasionál, garante mós dezenvolvimentu ida ne’ebé hakarak liutan ekilibru, partisipativu no sustentável ba nível sosiál no ekonómiku.

Ne’e forma di’ak ida hodi responde ba povu sira-nia hakarak husi governasaun ida ba liu dialógu ne’ebé rekoñese vontade povu hodi la fó maioria absoluta ba partidu ida de’it, ho konformidade ho apelu prezidente repúblika nian bainhira halo tomada pose ba membru governu foun sira.

“Ami hato’o votus atu inisiativa sira ne’e ba entendimentu, ba konferénsia ho sosiedade sívil, ba konsensu alargadu sira no ba sidadaun ka rona sidadaun sira, bele produz fuan di’ak konforme defende iha ita-nia misaun, hanesan sirku ba sidadaun sira ne’ebé hadomi dame, favór ba demokrasia ida ativu, esklaresidu, krítiku no koñesodora ba nia responsabilidade sira”, hatutan.

Dalan di’ak ba sidadania ida kondisiona menus ba manipulasaun sira, emosionál ka irasionál sira, no partisipativu liutan hodi buka solusaun ba dezafiu sira nasaun nian.

SSHD manifesta sira-nia ksolok boot tebes ba konteúdu da ba deklarasaun lider polítiku sira nian ba koligasaun, tuir akordu governu nian ne’ebé divulga ba órgaun komunikasaun sosiál sira, husi 14 to’o 17 setembru liliu iha nia prinsípiu sira ne´ebé asume ho povu.

“Ne’e mak ami entende resposta pozitiva ida ba dezafiu lansa husi ami iha 23 agostu  2017 ba konkretizasaun paktu sosiál ida, husi governante foun no sidadaun sira ka organizasaun sosiedade sívil sira nian”, subliña.

Entretantu, SSHD mós saúda governu da-hitu konstitusionál tanba nia membru sira hili bazea ba méritu, avaliasaun governu nian bazea ba efikasia no efisiénsia ba implementasaun, proporsionalidade ne´ebé refleta ba rezultadu eleitorál.

Nune’e mós igualidade ba jéneru, vontade atu kombate korupsaun, koluzaun no nepotizmu, vontade ba prepara tranzisaun jerasionál nomós prioridade ba tranzisaun jerasionál.

“Ami fiar katak bele, ho ita-nia haraik’an maibe asaun persistente, hodi kontribui ba aumentu prosperidade no felisidade ita-nia povu nian tuir ne’ebé promete ona hosi líder politiku partidariu oioin iha tinan-tinan”, reprezentante ne’e hakotu.

Jornalista: Rafy Belo

Editora: Rita Almeida

HUSIK IDA HATÁN