Aniceto Guterres Sei Hala’o Mandatu ho Dignu

0
290
Prezidente Parlamentu Nasionál, Aniceto Guterres. Foto Antonio Goncalves

DILI, (TATOLI) – Prezidente Parlamentu Nasionál, Aniceto Guterres promete sei sai Prezidente ba bankada parlamentár lima iha uma fukun no hala’o mandatu ho dignu tuir konstituisaun no rejimentu.

ʺHa’u promete atu sai duni presidente ba parlamentu tomak, la’ós presidente ba bankada ka grupu parlamentár ruma ka koligasaun ruma iha uma fukun ne’e, ha’u sei hala’o mandatu ne’e ho dignu tuir konstituisaun RDTL no rejimentu parlamentu nasionál nian ho indepéndensia perante bankada parlamentár hotu-hotuʺ, dehan nia iha diskursu bainhira eleitu nu’udar Prezidente PN.

Nia tenik, PN husi ninia própria natureza mak nu’udar órgaun soberania reprejentativu sidadaun tomak feto no mane ne’ebé hela iha rai laran no rai liur.

Alende ne’e, nia mós sei asegura disponibilidade kobertura ba mídia nasionál tantu impríme no elektrónika durante ninia mandatu.

ʺHa’u sei asegura disponibilidade no abertura ba imi ba buat hotu ne’ebé ha’u bele, tuir kbi’it ka poder ne’ebé ha’u ihaʺ, promete.

Alende ne’e sei servisu hamutuk ho órgaun soberania sira seluk nomos administrasaun públika, intituisaun F-FDTL, PNTL, igreja Katolika, konfisoen religiosa sira seluk, universidade, sosiadade sivil no seluk tan.

Governu sei sai forte bainhira hetan apoiu hosi Parlamentu ida ne’ebé forte, sólido no bele kopera ho governu liuhusi fiskalizasaun polítika ho rigor no halo lei ho kualidade.

ʺGovernasaun sei la’o di’ak no estável bainhira iha duni garantia estabilidade governativa hosi Parlamentu Nasionálʺ, realsa.

Prezidente Parlamentu Nasionál ne’e mós hato’o saudasaun espesial ba povu tomak no partidu FRETILIN hodi fó konfiansa ba nia hodi asumi responsabilidade ne’e.

Jornalista: Agapito dos Santos

Editora: Rita Almeida

HUSIK IDA HATÁN