Aniceito Husu Rui Asegura Governu Jestaun

0
369
Prezidente Parlamentu Nasionál Aniceito Guterres

DILI (TATOLI)-Prezidente Parlamentu Nasionál Aniceito Guterres husu ba Primeiru Ministru Rui Maria de Araújo atu asegura governu jestaun to’o setimo governu toma pose iha tempu besik.

Presidente Segundo Orgaun soberania hato’o pedidu ne’e hafoin halo primeiru enkontru ho Lidér Governu iha Uma fukun Parlamentu Nasionál Segunda Ohin, (11/09).

“Ha’u mós hato’o ba iha Primeiru Ministru atu asegura transferénsia husi VI Governu ba VII Governu konstitusionál ne’ebé mak sei mai,” Aniceto dehan.

Deputadu Kuarta lejislatura Parlamentu Nasionál ba periúdo 2017-2022 foin maka simu pose iha semana kotuk tanba ne’e iha enkontru refere mós oportunidade ba lidér orgaun soberania rua ne’e atu kumprimenta malu.

PM Rui Maria de Araújo hateten, iha enkontru ne’e atu esklarese kona-ba governu jestaun  no preparasaun  atu entrega governu ba governu foun.

“Ida ne’e mak ohin aproveita oportunidade ha’u mai hato’o kumprimentus formais, hato’o mós relatóriu  kona-ba funsionamentu Governu nian, iha ámbitu solidariedade konstitusionál entre Parlamentu ho Governu, hare mós oinsá mekanizmu atu koordena servisu,”  PM Rui esplika.

Aleinde ida ne’e ko’alia uitoan mós kona-ba prosesu preparasaun orsamentu mai oin, oinsá VI Governu sei infeta prosesu ne’ebé mak tenke liu husi Parlamentu nasionál aprovasaun programa Governu nian.

Iha parte seluk mós Prezidente Parlamentu Nasionál (PN), Aniceto Guterres informa tan, Prezidente Repúblika, Francisco Guterres “Lu-Olo” sei halo abertura ba sesaun dahuluk ba IV lejizlatura, 15 Setembru 2017.

“Karta Konvite Prezidente Repúblika, “Lu-Olo” ba tiha ona maibé karta hotu-hotu karik ohin eh aban bele distribui ona ba órgaun soberania sira seluk atu bele hola prezensa iha sesaun abertura Parlamentu Nasionál ba IV Lejizlatura,” Aniceto haktuir iha PN.

Entretantu Deputadu PN hamutuk 65 ne’ebé kompostu hosi partidu Haat hanesan partidu Frente Revolusionáriu Timor-Leste Independente (Fretilín) ho kadeira 23, Kongresu Nasionál Rekonstrusaun Timorese (CNRT-Sigla Portugés) ho kadeira 22, Partidu Demokrátiku (PD) ho kadeira 7, Kmanek Haburas Unidade Timor (Khunto) no Partidu Libertasaun Populár (PLP) ho kadeira 8.

 (Jornalista : Jornalista:Agapito dos Santos -Zezito Silva)

(Editór : Manuel Pinto)

HUSIK IDA HATÁN